Оны шилдэг дуу шалгаруулах “Морин хуур-34” уралдааны “Гран при” шагналыг Гавьяат жүжигчин, дуучин Э.Анхбаярын дуулсан “Жаргал дүүрэн эх орон” дуу хүртжээ. Энэ дууны аяыг хөгжмийн зохиолч Ш.Өлзийбаяр, шүлгийг нь Ц.Баярхүү зохиосон байна.
“Морин хуур” уралдаан нь үндэсний хөг эгшиглэнт дууны уран бүтээлийн төрөл хэлбэр агуулгыг өргөжүүлэх, уран бүтээлчдийн зохион туурвих бүтээлч хандлагыг нэмэгдүүлэх, үндэсний дууны урын санг баяжуулах зорилготой хамгийн том дууны наадам юм. Наадмыг жил бүр Монгол Улсын Ерөнхийлөгчийн тамгын газар, Боловсрол, соёл, шинжлэх ухааны яамнаас санхүүжүүлж, мэргэжлийн хөгжмийн урлагийн шалгуурт тэнцсэн, чанартай дууны бүтээл олон нийтэд түгээн дэлгэрүүлэхэд хувь нэмрээ оруулдаг.
