А.Үйлстөгөлдөр: “Илгээлт-2100” хөтөлбөрийн нэвтрүүлгийн талаар гарсан шүүмжлэлийг хүлээн авч, анхаарч ажиллана

97

“Илгээлт-2100” хөтөлбөрийн хүрээнд Монгол Улсын 330 сум, 171 хорооноос тус бүр Элсэлтийн ерөнхий шалгалтдаа хамгийн өндөр оноо авсан сурагчийг шалгаруулан гадаадын шилдэг их, дээд сургуульд элсэх батламж гардуулж байгаа.

Харин энэ талаарх нэвтрүүлгийг хийхдээ  “Хүүхдийн нэр төрд халдсан, зохисгүй зураглалтай” болсон хэмээн иргэдийн шүүмжлэл дагуулаад байгаа. Тэгвэл энэ тухай Ерөнхийлөгчийн Тамгын газрын дэд дарга А.Үйлстөгөлдөр тайлбар хийсэн байна.

Тэрбээр “Илгээлт-2100 хөтөлбөрийг улс орон даяар олон нийтэд таниулж, багш сурагчдыг урамшуулж, тэднийг сэдэлжүүлэх зайлшгүй шаардлагатай. Хөтөлбөр жил бүр явагдана. Дараа дараагийн жилийн сурагчид, ерөнхий боловсролын түвшинд ахиц гарах магадлал өндөртэй. Багш, сурагчдыг сэдэлжүүлж, чармайлт зүтгэлтэй байлгахын тулд бид нэг удаагийн нэвтрүүлэг бэлдсэн. Ингэхдээ баруун таван аймгийн таван хүүхдийг сонгож нэвтрүүлэг бэлдэн, цахим орчинд хэсэгчилж түгээсэн. Тодорхой шүүмжлэл гарсныг маш сайн хүлээж авч байгаа. Цаашид анхаарах болно” хэмээжээ.