Өнөөдөр Ерөнхийлөгчийн зарлигаар “Айзам” хамтлагийн ахлагч, хөгжмийн зохиолч, басс гитарчин Д.Ганболд Монгол Улсын Гавьяат Зүтгэлтэн цолоор энгэрээ мялаалаа. Түүнийг гэр бүл, урлагийн хамт олон нь хүндэтгэлтэйгээр хүлээн авсан юм.
Айзам хамтлаг 1977 онд 3 хүний бүрэлдэхүүнтэй Монголын Үйлдвэрчний Төв Зөвлөлийн харъяа Үйлдвэрчний Төв Зөвлөлийн Соёлын ордны дэргэд анх байгуулагдаж байжээ.
Тэр цагаас хойш монголын урлагийн ертөнцөд тус хамтлагийн басс гитарчин Д.Ганболдын “Итгэл”, “Дурсамж”, “Чи минь”, “Хавар”, “Чамдаа зориулъя”, “Амрагхан Агиймаа”, “Сумын наадам”, “Твист бүгдээрээ бүжиглэцгээе”, “Хайрын дууг минь сонсооч”, “Нутгийн цагаан шөнө” зэрэг ардын дуу мэт олон дуу төрөн гарч одоог хүртэл сонсогч түмнийхээ сонорыг мялаасаар байна.
