Оскарын наадмын өнгийг тодорхойлдог Америкийн “Cinequest” кино наадамд шалгарч “Шилдэг гэр бүлийн богино хэмжээний кино”-ны шагнал хүртсэн Монголын уран сайхны “Шат” богино хэмжээний кино Оскарт өрсөлдөх эрх авчээ.
Нийгэмд хөгжлийн бэрхшээлтэй иргэдийн оролцоог нэмэгдүүлэхийг уриалсан “Шат” богино хэмжээний киног Монголын Урлагийн зөвлөлийн “Бид чадна-Бид авьяастай” урлагийн боловсролын төслийн хүрээнд Австрали, Монгол мэргэжлийн кино уран бүтээлчид хамтран 2019 онд бүтээсэн билээ.
Тус кино нь 12 дахь удаагийн “Улаанбаатар” олон улсын кино наадам, Ази номхон далайн бүсийн дэлгэцийн форумд сонгогдож байсан удаатай.
Уг кинонд гэр хороололд амьдардаг, үсчин болох мөрөөдөлтэй Сонор үсчний сургалтад сурахаар шийдэх бөгөөд түүний өмнө даван гарах ёстой төрөл бүрийн шат тулгардаг тухай өгүүлнэ. Энэхүү кино нь хөгжлийн бэрхшээлтэй залуус өөрсдийн дуу хоолойг нийгэмд хүргэхийн тулд өөрсдөө оролцон бүтээснээрээ онцлог юм.