УИХ дахь АН-ын бүлгээс Ж.Батсуурь, Н.Ганибал нарыг хасах болсон талаар тус бүлгийн дарга Д.Ганбат өнөөдөр мэдээлэв.
Тодруулбал, АН-ын Үндсэн дүрмийн хороо энэ сарын 15-нд хуралдаж, Ж.Батсуурь, Н.Ганибал нарыг тус намын Үндсэн дүрмийг зөрчсөн хэмээн үзсэн байна. Тиймээс Ж.Батсуурь, Н.Ганибал нарыг АН-ын гишүүнчлэлээс дөрвөн жилийн хугацаатай хасах шийдвэр гаргажээ. Энэ дагуу УИХ дахь АН-ын бүлгийн хурал, үйл ажиллагаанд Ж.Батсуурь, Н.Ганибал нарыг оролцуулахгүй гэдгийг УИХ-ын гишүүн Д.Ганбат мэдээлсэн юм.
Ташрамд дурдахад, УИХ-ын 2020 оны ээлжит сонгуулиар АН-ын 11 нэр дэвшигч гишүүнээр сонгогдсон. Гэвч АН-ын дүрмийг зөрчсөн хэмээн үзэж Ц.Тувааныг гишүүнчлэлээс хассан гэдгийг УИХ дахь АН-ын бүлгийн дарга Д.Ганбат энэ сарын 14-нд мэдээлж байсан юм. Харин өнөөдөр Ж.Батсуурь, Н.Ганибал нарыг хассан шийдвэрийг танилцуулснаар тус намын бүлэг 8 гишүүнтэй боллоо.
