Талибууд Засгийн газрын хүчин рүү довтлон, бүх нутаг дэвсгэрт хяналтаа тогтоосноос хойш Афганистаны нөхцөл байдал маш хүнд болж ирсэн юм. Харин өнөөдөр тэднийг эсэргүүцэх цор ганцхан голомт тус улсад үлдсэн нь Панжшер.

Панжшерын хөндий нь хэн ч нурааж дийлэхгүй байгалийн бэхлэлт. Цавчим өндөр хадан уул, хөндийнүүд Панжшерт байрлаж, цэрэг дайны үйл ажиллагаа явуулсан бүхэнд таатай нөлөөлдөг гэж болно. ЗХУ-ын Афганистанд явуулсан дайны он жилүүдэд Зөвлөлтийн цэргүүд Панжшер руу 9 удаа довтолсон ч энэ бүгд нь амжилтгүй болж байсан. Долоо дахь дайралтын үеэр ЗХУ энэ хөндий рүү 30.000 орчим цэрэг илгээн, 200 нисдэг тэрэг, 60 сөнөөгч онгоц, 160 танк, хэдэн зуун авто машин ашиглаж байжээ.

1

Нийслэл Кабулаас зүүн хойш оршдог Панжшер нь Афганистандаа газар нутаг, хүн амынхаа тоогоор хамгийн бага мужид ордог. Энэ муж өдгөө талибуудын хяналтанд ороогүй ганц муж болжээ.

2

Энд 20 жилийн өмнө талибуудын гарт амиа алдсан Умард альянсын удирдагч Ахмад Шах Масудын хүү Ахмад Масуд тэргүүтэй хүч төвлөрчээ.

3

Масудын удирдлаган дор нутгийн журамт цэргүүд төдийгүй Афганистаны бусад бүсээс ирсэн цэргүүд, тэр дундаа тусгай анги нэгтгэлийн дайчид тулалдаж байна.

4

Ахмад Масудын хэлснээр түүний толгойлж буй зэвсэгт сөрөг хүчин улс орноо хамгаалж байгаа гэнэ.

5

Талибаны дайчид Панжшерийн хоолой руу хэд хэдэн удаа дайрах гэж оролдоод бүтээгүй юм.

6

Мягмар гарагт талибуудын төлөөлөгчид эсэргүүцэгчидтэй тохиролцоо хийхээр Панжшер луу явжээ.

7

“Хэлэлцээр нь асуудлыг дайн байлдаангүйгээр шийдвэрлэнэ. Дайтах шаардлага гарахгүй гэдэгт 80 хувь итгэлтэй байна ” гэж Талибаны төлөөлөгч Забихулла Муджахид хэлжээ.