Ковидтой тэмцэх байгалийн ургамал олджээ

Хойд Африк, Баруун Азид ургадаг хар зир хэмээх цэцэгт ургамлыг ирээдүйд коронавирусийн эсрэг шинэ бэлдмэл болгон хэрэглэж магадгүй хэмээн Австралийн католикийн их сургууль (ACU)-ийн профессор Каниз Фатима Шад мэдэгдсэнийг MedicalXpress эш татан дамжуулжээ.

Энэ ургамалд байдаг тимохинон гэдэг бодис нь SARS-CoV-2 коронавирусийн S уурагтай холбогдож, вирусийг цааш нь уушгины хатгалгаа үүсгэхээс сэргийлдэг гэнэ. Уг бодис нь түүнчлэн COVID-19-өөр хүнд өвчилсөн хүмүүст ажиглагддаг цитокины шуургыг зогсоодог байна.

Үүнээс гадна тимохинон нь үрэвсэл үүсгэгч химийн бодисуудыг чөлөөлөгдөхөөс сэргийлдэг болохоор харшил, багтраа, экзем, үений үрэвсэл, тэр ч байтугай тархмал хатуурлаас хүртэл сэргийлдэг гэж мэргэжилтэн мэдэгджээ.

Хар зир ургамал нь цусны даралт ихсэх, холестерин нэмэгдэх, чихрийн шижин зэрэг өвчинд тустай юм байна.

Эх сурвалж: Iz.ru