УИХ дахь АН-ын гишүүд Архангай аймагт ажиллаж, намын эв нэгдлийг сахиулах гэнэ

Архангай аймгийн ИТХ энэ долоо хоногийн эхээр хуралдаж аймгийн Засаг дарга Д.Золжаргалыг огцруулсан. Засаг даргыг огцруулах хуралдаанд 22 төлөөлөгч оролцсоны 3 нь АН-ын гишүүд байсан гэдэг.

Энэ талаар С.Эрдэнэ өөрийн твиттер хуудастаа мэдэгдэж “АН-ыг хорлох ЖАН-ын ажиллагаа тасраагүй байна” гэсэн агуулгатай өгүүлбэрийг жиргэж байсан юм. Тун удахгүй УИХ дахь Ардчилсан намын бүлгийн гишүүд Архангай аймагт ажиллахаар болж байгаа сурагтай.

УИХ дахь АН-ын бүлгийн дарга Д.Ганбат энэ асуудлаар зарим гишүүдтэй ярилцаж санал солилцсон бөгөөд АН-ын УИХ дахь гишүүд тун удахгүй Архангайг зорьж, аймгийн намын гишүүд болон  аймгийн ИТХ-ын хурал дахь Ардчилсан намын бүлгийн гишүүдтэй уулзах сурагтай.

Д.Ганбат энэ саналаа УИХ-ын гишүүн С.Одонтуяа, О.Цогтгэрэл нарт мөн дуулгасан бөгөөд орон нутагт хамт очиж ажиллахыг хүсчээ. Дашрамд дурдахад огцроод цөөн хонож байгаа Засаг дарга Д.Золжаргал нь С.Эрдэнийн хүн гэж яригддаг нэгэн юм.