Боловсрол, шинжлэх ухааны сайд Л.Энх-Амгалан өнөөдөр ОХУ-аас Монгол Улсад суугаа Онц бөгөөд Бүрэн эрхт Элчин сайд И.К.Азизовтой уулзав.
Хоёр орны боловсролын салбарын хамтын ажиллагааны хүрээнд 9 баримт бичиг хүчин төгөлдөр хэрэгжиж байна. Уулзалтын үеэр эдгээр баримт бичгийн хэрэгжилтийг хангах чиглэлд анхаарч, эрчимжүүлэхээр боллоо.
ОХУ-ын зургаан багш орон нутагт орос хэлний хичээлийг зайнаас зааж байна. Хоёр тун вакцин тариулж, тусгаарлалтад долоон хоног байх зөвшөөрөл олговол багш нар орон нутагт нь очиж танхимаар хичээл заах хүсэлтэй байгааг Элчин сайд уламжиллаа. Тусгай хэрэгцээт боловсролын тогтолцоог бэхжүүлэх, хөгжүүлэх зорилгоор хойд хөршид жилд 33 хүнийг бэлтгэхээр тохиролцсон ч цар тахлын улмаас түр саатсан хэдий ч энэхүү хамтын ажиллагаа цаашид үргэлжлэх юм. Мөн ОХУ-ын засгийн газар Монгол Улсад олгох оюутны тэтгэлгийн тоог нэмж 550 болголоо.
Хоёр улсын хамтарсан дунд сургууль байгуулах асуудал судалгааны шатандаа үргэлжилж байна. Ажлын хэсгийн гишүүд ойрын үед сургууль барих газартай танилцах шаардлагатай байгааг ноён Элчин сайд дуулгаад дээд сургууль байгуулах чиглэлд ч хамтрах боломж байгааг онцоллоо. Уулзалтын үеэр Боловсрол, шинжлэх ухааны сайд гарааны бизнесийг хөгжүүлэх, амжилтад хөтлөх арга туршлагаасаа хуваалцахыг ОХУ-ын талаас хүслээ.
ОХУ нь цар тахлын эхний үед бага ангийн хичээлийг танхимаар явуулж, дунд болон ахлах ангийнхан зайнаас суралцаж байсан бол одоо танхимын хичээлээ жигдрүүлсэн. Тиймээс цахим хичээлийн хүртээмж, агуулгыг сайжруулах чиглэлд туршлагаасаа нэвтрүүлэх, хоцрогдол нөхөх чиглэлд дэмжлэг үзүүлэхийг салбарын сайд хүссэн юм.
Мөн талууд уулзалтын үеэр вакцинтай холбоотой мэдээлэл солилцсон бөгөөд “Спутник V” вакциныг дэлхийн 45 улс хүлээж авсны нэг нь Монгол Улс юм. Манай улсын тухайд ирэх долоо хоногт багш нарыг вакцинжуулалтад хамруулахаар төлөвлөж байгаа. Цаашид вакцин дахин нийлүүлэх боломж байгаа гэсэн учир Засгийн газрын түвшинд ярилцахаар тохирлоо.
Боловсрол, шинжлэх ухааны яам
