Умард Солонгосын эсрэг хоригоос хойш Монголын нүүрсний экспортын орлого өсчээ

НЬЮ-ЙОРК. /Reuters/. Албаны эх сурвалжийн мэдээлснээр, энэ оны эхний 5 сарын байдлаар Монголын хувьд нүүрсний экспортоос олсон орлогын хэмжээ бараг 5 дахин нэмэгдсэн байна.

Монголын нүүрсний гол хэрэглэгч болох Хятад руу Умард Солонгосоос нүүрс нийлүүлэхийг хориглосон явдал нь ашиг орлогыг нэмэгдүүлэхэд  нөлөөлсөн байна.

Энэ онд гадаадын хөрөнгө оруулалтын хэмжээ болон түүхий эдийн үнэ буурч, нүүрсний эрэлт багассаны улмаас мөнгөний гачаалд орсон Монгол Улс Олон улсын валютын сангаас /ОУВС/ тусламж дэмжлэг хүсэхээс аргагүйд хүрсэн юм. Харин одоо Умард Солонгосоос нүүрс экспортлохыг НҮБ хориглосон тул Хятад улс нүүрс нийлүүлэгч өөр түнш хайх хэрэгтэй болсон. Энэ нь Монголд ашигтай тусч байгаа юм.

Монголын нүүрсний экспортын хэмжээ 2017 оны эхний 5 сарын байдлаар өмнөх оны мөн үеийнхтэй харьцуулахад 4.6 дахин өсч, 1.01 тэрбум долларт хүрсэн байна. Ингэснээр Монголын гадаад худалдааны орлого 69.5 хувиар өсч, 1 тэрбум долларт хүрсэн тухай тус улсын Үндэсний статистикийн хорооны ажилтан мягмар гарагт мэдээллээ.

БНХАУ-ын гаалийн албанаас хамгийн сүүлд гаргасан мэдээллээр бол, энэ оны эхний 4 сарын байдлаар Монголын тал Хятадад хүрэн нүүрс экспортолдог 2 дахь том экспортлогч болсон бөгөөд 11.7 сая тонн нүүрс нийлүүлсэн байна. Энэ нь 2016 оны мөн үеийнхтэй харьцуулахад 2 дахин нэмэгдсэн тоо юм. 4 дүгээр сард Монголоос БНХАУ-д экспортолсон нүүрсний үнэ тонн тутамдаа 66 доллар байгаа бөгөөд энэ нь өмнөх оны 4 дүгээр сартай харьцуулахад 2 дахин нэмэгдсэн үнэ юм. Гэхдээ энэ ханш нь Австралиас нийлүүлж буй нүүрсний дундаж үнэ болох 122 доллартай харьцуулахад хамаагүй хямд байгаа юм.

http://www.reuters.com/article/mongolia-economy-trade-idUSL3N1JB2G4

Х.Сарнай

Эх сурвалж: Монцамэ агентлаг

updown.mn

Мэдээний админ

Learn More →

Хариулт үлдээнэ үү

Таны имэйл хаягийг нийтлэхгүй. Шаардлагатай талбаруудыг * гэж тэмдэглэсэн