Монгол Улсаас өнөөдөр БНСУ руу тусгай үүргийн нислэг үйлдлээ. Гэхдээ энэ удаагийн нислэгээр иргэдээ татан авахгүй, эмнэлгийн тоног төхөөрөмж, бусад импортын техник төхөөрөмж хүлээн авах аж.
УОК-ын шийдвэрээр өнөөдрийн байдлаар Улаанбаатар-Сөүлийн чиглэлийн тусгай үүргийн нислэгээс бусад бүх нислэгийг цуцалж хойшлуулаад байгаа юм. Тодруулбал, энэ сард тусгай үүргийн 10 нислэг үйлдэхээр төлөвлөөд байсан ч одоогийн байдлаар 4 нислэгийг хийгээд байна.
Одоогийн байдлаар манай улсаас 106 удаагийн тусгай үүргийн нислэг үйлдэж, 20582 иргэнийг эх орондоо татан аваад байгаа юм. Мөн ОХУ болон БНХАУ-тай хиллэдэг хилийн боомтуудаар 6599 хүнийг зохион байгуулалттай татан аваад байгаа юм. Нийлбэр дүнгээр одоогийн байдлаар 27181 иргэнийг Монгол Улс татан авч тусгаарласан байна.
Энэ 11 дүгээр сарын байдлаар 4 удаагийн нислэг үйлдэж 602 иргэнийг татан аваад байна. Энэ сард ирсэн иргэдийг дотор нь ангилвал:
- бага насны хүүхэдтэй 46,
- 24 хүн эрүүл мэндийн шалтгаантай,
- 20 өндөр настан,
- 512 иргэн бусад шалтгаанаар ирээд байна.
Нэг ёсондоо бусад шалтгаантай гэсэн иргэдийн тоо сүүлийн нислэгүүдэд нэмэгдэж, энэ сард татан авсан иргэдийн 85 хувийг эзэлж буй талаар ОБЕГ-аас мэдээлж байна.
