СТА, дуучин Б.Алтанжаргал 11 дүгээр сарын 12, 13-нд “Корпорэйт конвешн центр”-т “Тэнгэрийн салхи” ардын дууны хоёр дахь бие даасан бүрэн хэмжээний тоглолтоо үзэгч олондоо хүргэх гэж байна.
Уг тоглолт нь Chillout буюу байгалийн чимээ, зөөлөн хэмнэл бүхий тайван уур амьсгалыг бүрдүүлсэн, бүрэн хэмжээний амьд тоглолт аж. Тоглолт болоход гурван хоног дутуу байгаа энэ үед бид бүхэн дуучин Б.Алтанжаргалтай тоглолтын талаар хэсэгхэн хором ярилцаа.
-Танд энэ өдрийн мэнд хүргэе. Тоглолтын бэлтгэл ажил гээд завгүй байна уу? Тоглолтын талаар мэдээлэл өгөөч?
-Баярлалаа. Тоглолтын бэлтгэл гээд үнэхээр завгүй байна. Гэхдээ цаг гаргалгүй яахав.
-“Тэнгэрийн салхи” ардын дууны тоглолтод нийт хэчнээн уран бүтээлчид оролцох вэ?
-Нийт 50-иад уран бүтээлч оролцоно. “Жонон” хамтлаг 10 хүний бүрэлдэхүүнтэй оролцоно. Мөн “Даанс лаб” бүжгийн хамтлаг, “этник” бүжгийн хамтлаг оролцоно. Бүжиг дэглээчээр Ё.Дамчаабадгар ажиллаж байна. Мөн уртын дуучин Л.Баяржавхлан оролцоно.
Өвөрмонголын дуучин Д. Цэвэрцэцэгтэй “Алтанхундага” хэмээх дууг дуулсан. Таны тоглолтод оролцох уу?
Уг нь бол ирж оролцох хүсэл их байсан ч коронавирусийн улмаас хил хаасан болохоор оролцох боломжгүй болсон.
-Нийт хэчнээн дуу дуулагдах вэ?
-Ер нь 20 гаран дуу дуулагдана. Тоглолтод дуулагдах уран бүтээлийн 80 хувь нь миний өмнө нь дуулж байгаагүй хуучны сайхан дуунууд байгаа. Нэг ёсондоо шинэ дуунууд дуулагдана гэж ойлгож болно. “Дөмөн хонгор аялгуу” тоглолтод дуулагдсан нэг ч дуу дуулагдахгүй.
– “Тэнгэрийн салхи” тоглолт “Дөмөн хонгор аялгуу” тоглолтоос юугаараа ялгаатай вэ?
-“Тэнгэрийн салхи” ардын дууны тоглолт маань миний хоёр даах бие даасан тоглолт. 2018 оны арваннэгдүгээр сарын 2-нд “Дөмөн хонгор аялгуу” тоглолт болж байлаа. Ингээд хоёр жилийн дараа дахин тоглож байна. Энэ тоглолт маань хоёр өдөр болно. Энэ тоглолтод жонон хамтлаг бүрэн бүрэлдэхүүнээрээ оролцож байна. Тоглолт маань үндсэн хоёр хэсгээс бүрдэнэ.
-Тоглолтын ивээн тэтгэгчээр хаанах ажиллаж байгаа вэ?
Тоглолтын Ерөнхий ивээн тэтгэгчээр “Ай энд Жи Интернейшнл ХХК”, дэмжигч байгууллагаар “Корпорэйт Хотел энд Конвеншн центр”, “Талын эзэн ХХК”, “E Студи”, “Хөхүүр айраг зоог”, “Хуяг брэнд”, “Намнаа клуб”, “Лимитлес рекордс” тус тус ажиллаж байна.
– Цаг зав гаргаж, тоглолтынхоо мэдээллийг өгсөнд баярлалаа. Таны уран бүтээлд өндөр амжил хүсье.
– Баярлалаа
Л.Баяр
