Шилэн Цогоо "Улаан бал"-ын хөтлөгч Ч.Лодойсамбуугаас тайлбар шаарджээ

Сонгуулийн дараах МАН-ын ялалтын бялуунаас хүртэж амжилгүй хоцорч, залуусын хэлдэгээр “хийцгүйрсэн” Шилэн Цогоо сүүлийн үед идэвхжиж, шилэн дансыг сайн гэгч нь самарч байгаа. Дараагийн ээлжинд тэр яам шалгалтанд бэлд гэхчилэн эгээ л Ерөнхий сайд шиг, АТГ-ын дарга шиг зандрах болсон Шилэн Цогоог олон нийтийн сүлжээнийхэн “Намаа шантаажилж, ажил горьдож байна” хэмээн шүүмжилж байгаа ч тэр шилэн дансаа ухсаар л байгаа.

Бүхий л зав чөлөөгөө Шилэн дансанд зориулж байгаа Цогоогийн хүчээр улсын төсвийн үрэлгэн зардлууд ил болж байгаа нь сайн хэрэг ч Цогоод гаргах мэдээлэл, гаргахгүй мэдээлэл гэж бас байдаг бололтой. Шилэн Цогоо өчигдөр “Эрдэнэт” үйлдвэрийн шилэн дансыг ухаж байгаад үйлдвэрээс 18 сая 181 мянга гаруй төгрөгийг урьдчилгаа болгон авсан “Президент ПИАР” нэртэй компанийн мэдээллийг олоод авчээ.

Бусдыг бол овог, нэр, албан тушаалаас нь эхлээд арай л эхнэртэй нь зарлачихдаггүй Шилэн Цогоо энэ мэдээнд нэлээн болгоомжтой хандан “Маягтай хог вэ, яасан. Президент ПИАР агентлаг гэнэ ээ” гэсэн товчхон тайлбарыг тэмдэглэн үлдээж, тус агентлагаас хариу хүлээгээд сууж байна.

“Эрдэнэт” үйлдвэрийн данснаас гарсан хэсэг бүлэг гүйлгээг харуулсан баримт дунд нэр нь орж ирсэн, Цогоогийн эзнийг нь зарлаж зүрхлээгүй “Президент ПИАР агентлаг”-ийг Монголын хамгийн шударга ТВ шоу хэмээн олонд ойлгогддог “Улаанбал” нэвтрүүлгийн хөтлөгч Ч.Лодойсамбуу 100 хувь эзэмшдэг юм байна. Санхүүгийн гүйлгээн дээр “зар сурталчилгааны аванс” хэмээн тэмдэглэсэн байгаа нь гэрээний дараагийн төлбөр хүлээгдэж байгаа гэсэн үг. Том аж ахуйн нэгжийн урьдчилгаа 50 хувь, багадаа 30 хувь гэж үзвэл Ч.Лодойсамбуу “Эрдэнэт” үйлдвэрээс дахин 18 сая гаруй төгрөг авах юм.

“Эрдэнэт” үйлдвэр сүүлийн 4-5 жил улс төр болон хэвлэл мэдээллийнхний анхаарлаас салаагүй. Үйлдвэрийн 49 хувьтай холбоотой гомдол мэдээлэл, хууль бус хэмээн яригдаж байгаа асуудлууд Улаанбал нэвтрүүлгээр хөндөгддөггүй нь “Эрдэнэт” болон “Президент ПИАР агентлаг” хоорондын олон саяын гэрээний хүч байх нь гэдгийг иргэд Шилэн Цогоогийн мэдээллээс олж авч байгаа бололтой.