Улс төр

АН-ын дарга С.Эрдэнийг Монгол Улсын нийт иргэдээсээ уучлал гуйхыг шаардав

“Хилийн чанад дахь Монголчуудын холбоо” гадаадад сурч, ажиллаж, амьдарч байгаа 200 мянган Монгол иргэнийг төлөөлж АН-ын дарга С.Эрдэнэд шаардлага хүргүүлжээ.

Өчигдөр УИХ-ын гишүүн, АН-ын дарга С.Эрдэнэ “Гадаадаас монгол иргэд авчирч Коронавирус импортлох хэрэггүй” гэж мэдэгдэл хийсэн юм. Тиймээс энэхүү хариуцлагагүй мэдэгдэлтэй нь холбогдуулж, нийт иргэдээсээ уучлалт гуйхыг шаардлаж байгаа аж.

Тус холбооны шаардлагад “Хүн амын хөгжил, Нийгмийн Хамгааллын сайдаар ажиллаж байсан УИХ-ын гишүүн, АН-ын дарга С.Эрдэнэ маш хариуцлагагүй мэдэгдэл хийсэнд их харамсаж байгаагаа илэрхийлээд гадаадад байгаа Монгол иргэдийн нөхцөл байдал хүндэрч, гудамжинд гарахдаа тулж байгааг дурджээ. Тодруулбал:
“Гадаадад ажиллаж, амьдарч, сурч байгаа олон иргэдийн нөхцөл байдал хүндэрч байна. Ялангуяа иргэд ажлын байраа алдах, оюутан залуучууд дотуур байрнаасаа хөөгдөж, тэтгэлэг нь цуцлагдаж, хоноглох газаргүй, хоол ундгүй, ажил хөдөлмөр эрхлэх ямар ч боломжгүй болж айл айлын хаалга тогшин, гудамжинд гарах дээрээ тулаад байна.

Олон улс оронд Ази гаралтай хүмүүсийг ялгаварлан гадуурхах, арьсны өнгө, угсаа гарвалаар нь доромжлох, тэднийг заналхийлж, амь нас, эрүүл мэндэд аюултай нөхцөл байдал үүслээ. Гэтэл ард иргэдийн итгэлийг хүлээж УИХ-ын гишүүнээр сонгогдсон төрийн түшээ, АН-ын дарга хүн эх орноо зорих иргэдээ “Тахал импортлогч”, Золиосны хүмүүс хэмээн ад үзэж, Монгол хүний амь нас, эрүүл мэндийг золиосонд гаргахыг шаардаж, Үндсэн хуулиар олгогдсон амьд явах, эрүүл, аюулгүй орчинд амьдрах, эрүүл мэндээ хамгаалуулах, сурч боловсрох эрхийг хязгаарлаж, ялгаварлан гадуурхах нөхцөл байдал бий болгож байгаад туйлаас харамсаж байна.

Үндсэн хуулиар олгогдсон эрхээ эдлэн эх орноо зорин очиж байгаа иргэдээ Тахал импортлогчид хэмээн нэрлэсэн нь хилийн чанадад болон эх орондоо суугаа олон зуун мянган иргэдийн дургүйцлийг төрүүллээ. Өнөөдрийн байдлаар олон иргэд эх орондоо буцах хүсэлтээ илэрхийлэн Хилийн Чанад дахь Монголчуудын Зөвлөл ТББ-д хүсэлтээ ирүүлээд байна. Эдгээр иргэд бол С.Эрдэнэ дарга таны хэлж байгаачлан “Тахал импортлогчид ” биш, халдвар тээгчид ч биш. Иргэд чадлынхаа хэрээр халдвар авахаас өөрсдийгөө хамгаалж, онгоцны тийз, тусгаарлагдах байрны төлбөрөө бэлтгэж, эх орон маань биднийг авна гэсэн итгэл дүүрэн хүлээж байна.

Хүний газар дарамт шахалт амсаж, ажил, сургуульгүй, орох оронгүй гудамжинд гарч байгаа иргэд, оюутан залуучуудыг эх орондоо авчрах ажил таны хариуцлагагүй мэдэгдлээс болж зогсвол, монгол иргэдийн амь нас, эрүүл мэнд хохирвол Хилийн Чанад дахь Монголчуудын Зөвлөл ТББ болон эдгээр иргэд, оюутан залуучуудын ар гэрийнхэн танаас хариуцлага нэхэх болно гэдгийг хатуу сануулж байна.

Хилийн чанадад үйл ажиллагаа явуулж байгаа Монголчуудын 170 гаруй холбоо, төрийн бус байгууллагуудын хамтын ажиллагааны нэгдэл, тэднийг төлөөлсөн байгууллага болох Хилийн Чанад дахь Монголчуудын Зөвлөл ТББ-аас С.Эрдэнэ таныг иргэдээ доромжилсон, Үндсэн хуулиар олгогдсон эрхийг нь хааж боох гэсэн үг яриа, үйлдэлдээ Монгол Улсын нийт иргэдээсээ хэвлэл мэдээллийн хэрэгслээр уучлал гуйхыг шаардаж байна.

Хэрвээ та бидний тавьсан шаардлагыг хүлээж авч уучлал гуйхгүй тохиолдолд таныг хилийн чанад дахь иргэдийн эрхийг зөрчсөн, алдар хүндэд халдсан хэмээн үзэж УИХ-ын Ёс зүйн дэд хороонд хандах бөгөөд шаардлагатай бол хууль хяналтын байгууллагад хандахаа үүгээр мэдэгдэж байна” гэжээ.

Б.ИРЭЭДҮЙ

ХОЛБООТОЙ МЭДЭЭ

2 Сэтгэгдэлтэй

  1. Хаанахын юун холбоо вэ? Холбоо чинь хаана хэзээ үүссэн, холбооныхоо бүртгэл, лайсэнз, хаяг дугаараа мэдүүл дээ?? Бид ийм холбоо молбоо сонсоогүй мэдэхгүй юм бна.. Ханахын ямар хот, сургуулын хэн гэж оюутан С.Эрднээс болоод гудамжинд гарчив? Тодорхой нэр ус хаяг мэдээлэл хэрэгтэй бна..Эрдэнэ саяхан 2-3 хоногийн өмнө мэдээлэл хж бгаа харагдсан зурагтаар.. тэгээд энэ оюутнууд чинь 2 хоногийн дотор орон гэргүй, сургуульгүй, хоолгүй гудамжинд гарчиж бгаа хэрэг үү?? Хүн гүтгэж харлуулаж Эрднээс өс хонзон авах гэж бгаа бол ийм ядарсан зальхай арга хэрэггүй ээ..Хэний зараалаар тэнэгтэж яваа тэнэгүүд вэ? Гадаадад 200 гаран мянган Монголчууд амьдардаг! Та нар ингэж худлаа ярьж амьтан хүн бужигнуулж явхаасаа ичээч!! Би Америкт 24 жил боллоо.. Та нарын өмнөөс бөгс улайв!! Би Эрдэнэд дургүй! Тэр бол сайн хулгайч, луйварчин! Гэхдээ энэ удаа вирус импортлогчдын тухай маш үнэн зүйл хэлсэн!! Эрдэнэ хэлсэн болхоос үнэн шүү!! Яаж ч өвдсөн үхсэн бид эндээ л дуусна!! Эрүүл саруул үедээ нутагтаа очино шүү.. Хэн хаана ч өвдсөн Монголд л очиж болохгүй! Ингэж л ард түмнээ хайрлая даа..

  2. За болж үз дээ харин хүүк вирус оруулж ирснээрээ 1 уучлалт гуй даа бүр түгшүүртэы болгочихлоо

Сэтгэгдэл

Таны сэтгэгдэл

Back to top button
Close