“Гацуурт” компани ХХААХҮЯ-ны харьяа сангуудаас хөнгөлөлттэй нөхцөлөөр их хэмжээний зээл авсныг буцаан төлүүлэх ажлыг эрчимжүүлэх тушаалыг салбарынх нь сайд гаргаж байгаа гэсэн мэдээлэл бидэнд ирлээ. Тус компанийнхан гурил үйлдвэрлэгч “Хангай миллс” ХХК-д буудай нийлүүлээгүй хэрнээ ТЭДС-гаас их хэмжээний урамшуулал авч, залилан мэхэлсэн гэх хэргийг ЭЦА-ны Эдийн засгийн гэмт хэрэгтэй тэмцэх газарт шалгаж байгаад прокурорын шатанд хэрэгсэхгүй болгосон юм.
Дээрх хоёр компанийн хооронд нийлүүлсэн, нийлүүлээгүй гэсэн, 25 мянга шахам тонн буудайн маргаан бий бөгөөд урамшуулалд хоёр тэрбум гаруй төгрөг ТЭДС-гаас авсан хэмээн шинжээчид дүгнэсэн байдаг. “Гацуурт” компанийн харьяа аж ахуйн нэгжүүдээрээ дамжуулан дээрх сангаас урамшуулал авсан нь шалгалтаар илэрхий болсон юм.
Түүнчлэн ХХААХҮЯ-ны харьяа Мал хамгаалах сангаас “Махны цэвэр үүлдийн үхэр импортолж үржлийн аж ахуй эрхлэх” төсөл сонгон шалгаруулахад “Гацуурт” компани шалгарч, зургаан жилд багтаан стандартын шаардлага хангасан үржлийн өсвөр хээлтэгч үхэр уг санд төвлөрүүлэхээр болсон. Мөн “Монгол мал” хөтөлбөрийн хүрээнд мах, сүүний чиглэлийн үхэр нийлүүлэхээр хоёр тэрбум төгрөгийн зээл авсан ч гэрээгээ зөрчсөн, хугацаандаа төлөөгүй, дутуу төлсөн зэргийг Сангийн яамны Санхүүгийн хяналт, эрсдэлийн удирдлагын газрынхан шалгаж тогтоосон билээ. Тиймээс ХХААХҮ-ийн сайд тушаал гаргаж, “Гацуурт” компанийн удирдлагаас тусгай сангуудад учруулсан хохирлыг нөхөн төлүүлэх болж, УЕПГ-ын Төр, нийтийн ашиг сонирхлыг хамгаалах албанд хандах аж.
Бэлтгэсэн: Г.Равжаа
