Оффшор бүсэд хамаарах улс, нутаг дэвсгэрийн жагсаалт гэх нэршлийг өөрчилжээ

2020-03-06 13:445min0
62f5c70b-0713-4012-82ce-a70bd5584fc2

УИХ-ын Аюулгүй байдал, гадаад бодлогын байнгын хороо өнгөрсөн арванхоёрдугаар сарын 5-ны хаалттай хуралдаанаар Оффшор бүсэд хамаарах гадаад улс, түүний нутаг дэвсгэрийн жагсаалтын нэршлийг өөрчлөх асуудлаар Засгийн газарт чиглэл өгөх тухай асуудлыг хэлэлцжээ.

Ингээд 19 гишүүнээс 10 нь оролцсон хуралдаанаар дэмжсэн байна. Байнгын хорооноос өгсөн чиглэлийг үндэслэж Засгийн газар 2020 оны хоёрдугаар сарын 19-нд хуралдаж, 2017 оны 326 дугаар тогтоолоо өөрчилсөн байна.

Уг тогтоолоор Оффшор бүсэд хамаарах гадаад улс, түүний нутаг дэвсгэрт 49 оронг оруулаад байсан юм. Харин тогтоолд өөрчлөлт оруулснаар оффшор биш “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх зорилгоор гаргасан гадаад улс, түүний нутаг дэвсгэр” гэж нэрлэжээ.

Мөн 244 дүгээр тогтоолыг бүхэлд нь хүчингүй болгож, “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасны дагуу хувийн ашиг сонирхлын болон хөрөнгө, орлогын мэдүүлэг гаргадаг албан тушаалтан, түүний хамаарал бүхий этгээд тухайн албан тушаалтны албан үүрэг гүйцэтгэх хугацаанд банкны данс нээлгэх, мөнгөн хөрөнгө байршуулах, хөдлөх, үл хөдлөх хөрөнгө өмчлөх, хувь нийлүүлэх замаар хуулийн этгээд үүсгэн байгуулахыг хориглох оффшор бүсэд хамаарах гадаад улс, түүний нутаг дэвсгэрийн жагсаалтыг хавсралт ёсоор баталсугай” гэсэн заалтыг устгажээ.

Ингэснээр хөрөнгө орлогоо мэдүүлдэг албан тушаалтнууд, тэдгээрийн төрөл садан оффшор бүсэд данс нээлгэх, хөрөнгө байршуулах, өмчлөх, компани байгуулахыг хориглохоо больж байгаа юм биш. Учир нь, Сонирхлын зөрчлийн тухай гэж нэршиж заншсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд энэ нь хориотой. Иймээс хийдэл, зөрчил, сөрөг үр дагавар гарахгүй гэдгийг АТГ-ын эх сурвалж баталж байна.

Харин ч Байнгын хорооны чиглэл, Засгийн газрын тогтоол нь гадаадын улстай тогтоосон дипломат, найрсаг харилцаанд сөрөг үр дагавар авчрахаас сэргийлсэн косметик засвар байж. Швейцарын Үндэсний зөвлөлийн дарга, хатагтай Марина Кароббио Гүшетти Монголд ирэх үеэрээ ч, УИХ-ын дарга Г.Занданшатарыг тус улсад айлчлах үеэр ч хөрөнгө оруулагч, бизнесийнхэнд ээлтэй байдлаар Засгийн газрыг тогтоолыг өөрчилж өгөхийг хүссэн байдаг юм.

Засгийн газрын 2017 оны 326 дугаар тогтоолын хавсралт

Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх зорилгоор гаргасан гадаад улс, түүний нутаг дэвсгэрийн жагсаалт

  Нэр (монгол хэлээр)             Нэр (англи хэлээр)
  Ангиль Anguilla
2. Андоррагийн Хант Улс Andorra
3. Антигуа Барбуда Antigua & Barbuda
4. Арабын Нэгдсэн Эмират United Arab Emirates
5. Аруба Aruba
6. Барбадос Улс Barbados
7. Бахамын арлууд Bahamas
8. Бахрейны Хаант Улс Bahrain
9. Белиз Улс Belize
10. Бермудын арал Bermuda
11. Ботсвана Botswana
12. Британийн Виржинийн арлууд British Virgin Islands
13. Бруней Brunei
14. Бүгд Найрамдах Вануату Улс Vanuatu
15. Бүгд Найрамдах Кипр Улс Cyprus
16. Бүгд Найрамдах Коста-Рика Улс Costa Rica
17. Бүгд Найрамдах Либери Улс Liberia
18. Бүгд Найрамдах Ливан Улс Lebanon
19. Бүгд Найрамдах Мавритан Улс Mauritius
20. Бүгд Найрамдах Мальта Улс Malta
21. Бүгд Найрамдах Панам Улс Panama
22. Бүгд Найрамдах Уругвай Улс Uruguay
23. Гернси Guernsey
24. Гибралтар Gibraltar
25. Гренад Улс Grenada
26. Доминикийн Хамтын Нөхөрлөлийн Улс Dominica
27. Жерси Jersey
28. Ирланд Улс Ireland
29. Кайманы арлууд Cayman Islands
30. Куракао Curacao
31. Куукийн арлууд Cook Islands
32. Лихтенштейний Вант Улс Liechtenstein
33. Люксембург Luxembourg
34. Макао Macao, SAR
35. Малайз Malaysia
36. Маршаллын арлууд Marshall Islands
37. Монако Monaco
38. Монтсеррат Улс Montserrat
39. Мэний арал Isle of Man
40. Нидерландын Антиллийн Арлууд Netherlands Antilles
41. Самоагийн Тусгаар улс Independent State of Samoa
42. Сейшелийн Арлын Бүгд Найрамдах Улс Seychelles
43. Сент-Винсент-Гренадин Улс St. Vincent and Grenadines
44. Сент-Китс-Невисийн Холбооны Улс St. Kitts and Nevis
45. Сент-Люси Улс St. Lucia
46. Сингапур Singapore
47. Тёркс-кайкосын арлууд Turks and Caicos Islands
48. Хонконг Hong Kong, SAR
49. Швейцар Switzerland

Эх сурвалж: time.mn 

Сэтгэгдэл бичих

Цахим шуудан нийтлэгдэхгүй