Америкийн кино академийн 92 дэх удаагийн Оскарын шагналыг гардуулах ёслолын ажиллагаа өчигдөр болж, Өмнөд Солонгосын Шимэгч киноны уран бүтээлчид дөрвөн ч шагналыг авсан. Тэгвэл Оскарын шагнал гардуулах ёслолтой холбоотой арга хэмжээний үеэр Өмнөд Солонгосын Самсунг компани удахгүй худалдаанд гаргах Galaxy Z Flip утсаа танилцуулсан албан ёсны сурталчилгааг мөн сонирхуулжээ.
Самсунг компани Galaxy Z Flip гэх жижиг оврын, дэлгэгддэг ухаалаг утасны 30 секундийн сурталчилгааг сонирхуулсан байна. Тус компани шинэ бараа бүтээгдэхүүнээ танилцуулах “Unpacked” гэх үйл ажиллагаанаас өмнө ийнхүү Galaxy Z Flip-ийг харуулсан байна. Тус богино хэмжээний сурталчилгаагаар шинэ төрлийн утас дэлгэгдэж, нэг том дэлгэц болж байгааг харуулжээ. Утасны нүүрний дээд хэсэгт үндсэн цэсийг байршуулж өгчээ.
Самсунг компани анх удаагаа Galaxy Z Flip утасны дүрс, бичлэгийг олон нийтэд харуулж байгаа ч энэ утасны талаарх мэдээлэл аль хэдийн алдагдаж, цахим орчинд тархаад байгаа юм. Самсунг компани Galaxy Z Flip утасны зах зээлийн үнэ болон яг хэзээнээс худалдаан гарах талаарх мэдээллийг хараахан гаргаагүй байгаа юм.
Мягмар гараг буюу өнөөдөр болох шинэ бүтээгдэхүүнээ танилцуулах өдөрлөгийн үеэр Galaxy Z Flip утасны талаарх дэлгэрэнгүй мэдээллийг өгөх байхаа гэсэн хүлээлт байна. Үүнээс өмнө Самсунг компани Galaxy Fold гэх 4.6 инчийн жижиг оврын ухаалаг утсыг танилцуулж байсан юм. Энэхүү утас нь дэлгэгдэх үедээ 7.3 инч болдог. Galaxy Fold өнгөрсөн намраас худалдаанд гарсан юм.
