“Оюу Толгой” төслөөс өнгөрсөн жилийн үйл ажиллагааны тайлангаа гаргажээ. Тус төслийн хүрээнд 2019 онд 146.3 мянган тонн зэс, 241.8 мянган унц алт бүхий баяжмал боловсруулжээ.
Өнгөрсөн оны сүүлчийн улиралд хүдрийн агуулгаас хамаарч баяжмал дахь зэсийн гарц буурсан болохыг “Turquoise Hill Resources” компани тайландаа дурджээ. Энэхүү үйл ажиллагааны тайлантай зэрэгцээд “Turquoise Hill Resources”-ийн хувьцааны ханш Торонтогийн Хөрөнгийн биржид 4.5 хувиар өсөж, 0.92 канад доллар болсон байна. 2020 онд “Оюу Толгой” төслийн хэмжээнд 140-170 мянган унц зэс, 120-150 мянган унц алт бүхий баяжмал боловсруулахаар төлөвлөснөө дурьджээ. 2019 онтой харьцуулахад баяжмал дахь зэсийн агууламж өсөх ч алтны агуулга буурах төлөвтэй байна.
Үүнээс гадна үйл ажиллагааны зардал нь 800-850 сая ам.доллар байх тооцоог гаргаад байна.
Түүнчлэн 2020 онд ил уурхайн хөрөнгийн зарцуулалт 80-120 сая ам.доллар, далд уурхайд 1.2-1.3 тэрбум ам.доллар байхаар тооцоолжээ. “Оюу Толгой”-ийн гүний уурхайн үйлдвэрлэлийн амны бүтээн байгуулалтыг дууссан гэдгийг “Rio Tinto” онцоллоо. Мөн гүний уурхайн анхны олборлолт эхлэх хугацааг хойшлуулахаар болоод байна. Уурхайн загварыг төлөвлөсний дагуу оны эхний хагаст гаргаж, ТЭЗҮ-ийг оны хоёрдугаар хагаст эцэслэн шинэчилнэ гэж “Rio Tinto”- ийн тайланд дурджээ. Тус компани 2020 онд зэсийн гарцаа 530-570 мянган тонн болгохоор төлөвлөж байна.
