Хүүхэд бол гэр бүлийн аз жаргал, эх орны ирээдүй. Өдөр өдөрт өсөн төлжиж, өнгө зүс орж яваа сэвлэг даахьтай нялх балчир үр хүүхдээ өхөөрдөн бахархадаггүй ээж аавууд гэж үгүй.
Хиргүй тунгалаг сэтгэл, гуниггүй тормогор нүд шаналж, хайр хүрэм жижигхэн гар сульдаж, үргэлж асуун лавлан шулганах өхөөрдөм яриа цөөрч, хүүхэд хүндээр өвдөх шиг элэг эмтрэм зүйл үгүй. Нэг ой, есхөн сартай Ганбатын Хулан охин ийм хүнд өвчинд ээрэгдэн, шаналж байна.
Бяцхан охиныг эмч нар үр хөврөлийн гаралтай хорт хавдраар өвдсөн хэмээн оношилсон бөгөөд Эх хүүхэд эрүүл мэндийн үндэсний төвд тавдугаар сарын 20-нд мэс засалд орж, ахар сүүлнийхээ 3 үеийг тайруулж, аарцагныхаа хөндийгөөс 250 гр жинтэй хорт хавдар авахуулжээ.
Ээжийнхээ энгэрт асаж, хөхнийхөө сүүг амтлахыг жаргалд тооцохоос бусдыг үл анзаарах нэгхэн насанд 250 гр жинтэй хорт хавдар авахуулна гэдэг гунигтай. Хүнд өвчний шаналан, хүнд хагалгааны дараах өвдөлтийг бяцхан биендээ үүрч яваа Г.Хулан энэ мэс заслын дараа 4 курс химийн эмчилгээ хийлгэжээ.
БНХАУ-ын Хөх хотод 2019 оны 10 сарын 25-нд хийлгэсэн цөмийн PT/CT шинжилгээгээр ташааны 2 тал болон хүзүүний хэсэгт хорт хавдрын үсэрхийлэл байна гэсэн хариу гарч, охины эрүүл мэнд дахин хүнд сорилын өмнө ирсэн гэдгийг эмч нар анхааруулаад байна.
Бяцхан охин Г.Хулан одоогийн байдлаар 6 курс хийлгэсэн бөгөөд цаг алдахгүй гадаадад эмчлүүлэх шаардлагатай тулгараад буй юм. Охины оношийг БНХАУ-ын Бээжин хотын Хүүхдийн эмнэлгийн хорт хавдрын тасаг болон БНСУ-ын Сөүл хотын АСАН эмнэлэгт явуулсан бөгөөд Сөүлийн АСАН эмнэлэг эмчилгээнд хамгийн багадаа монгол мөнгөөр 180 орчим сая төгрөг шаардагдана гэсэн хариу ирүүлжээ.
Охины ээж, аав эмчилгээ сувилгааны бүхий л аргыг эрэлхийлж байгаа бөгөөд хүнд өвчинд шаналсан охинд минь энэрэлийн гараа сунгана уу хэмээн Монголчуудаасаа хүсчээ. Амьдралын төлөө тэмцэж яваа хиргүй тунгалаг сэтгэлтэй бяцхан охины хагалгааны төлбөрт туслах аяныг эхлүүлцгээе.
Нэг нь нийтийн төлөө, нийт нь нэгийн төлөө гэсэн халуун дулаан сэтгэлтэй Монгол хүн бүрийг бяцхан Г.Хулангийн төлбөрт боломж боломжоороо хандив өргөхийг уриалж байна.
Хандивыг:
Г.Хулангийн аав П.Ганбатын ХААН банк: 5944008614
Худалдаа хөгжлийн банк: 475046006
Г.Хулангийн ээж А.Солонгын ХААН банк: 5944016830
Төрийн банк: 250900002881
дугаарын дансаар авч байна. Харилцах утас: 90991189, 98199177
Эх сурвалж: tovchoo.mn
