95 жилийн өмнө Монголын өнцөг булан бүрээс аймаг, шавь, хошууны 77 төлөөлөгч Нийслэл Хүрээнд хуран цуглаж Анхдугаар их хурлаа хийж хаант засгаас бүгд найрамдах засаглалд шилжин, хамжлагат ёсыг халсан анхдугаар Үндсэн хуулийг 15 хоног хэлэлцэж, 1924 оны арваннэгдүгээр сарын 26-ны өдөр баталж байжээ.
Монгол Улс түүхэндээ 4 удаа Үндсэн хууль баталсан байдаг.
Хамгийн сүүлийн буюу 1992 онд баталсан ардчилсан Үндсэн хууль хүний эрх, ардчилсан засаглалаа бэхжүүлэхэд үнэтэй хувь нэмэр оруулсаар ирсэн билээ. Тус Үндсэн хуульд нэмэлт, өөрчлөлт оруулах шаардлага, оролдлогыг сүүлийн гурван парламент дамжиж хэлэлцэн 2019 оны намрын чуулганаар нэмэлт, өөрчлөлтийг баталсан билээ.
Тэгвэл анхдугаар Үндсэн хуулиа баталсан 95 жилийн ойн энэ өдөр Үндсэн хуулийн нэмэлт, өөрчлөлтийг уг эхийг баталгаажуулах ёслол болох юм байна.
Энэ удаагийн парламент 1992 оны Үндсэн хуулийн 19 зүйл, 36 заалтад өөрчлөлт оруулаад байна.
