Азийн зуны спортын XX наадамд Монгол Улс 15 медаль хүртлээ

Японы Айчи мужийн Нагояа хотноо Азийн зуны спортын XX наадам “Imagine One Asia” уриан дор 16 өдөр үргэлжлэн болж шилдгүүдээ тодрууллаа.

Наадамд Азийн 45 үндэсний олимпын хорооны 11 мянга гаруй тамирчин 43 спортын 71 төрөлд оролцож 469 багц медалийн төлөө өрсөлдсөн юм. Монгол Улсаас 30 спортын төрөлд 300 орчим тамирчин оролцож, нэг алт, нэг мөнгө, 13 хүрэл медаль хүртэн нийт 15 медальтайгаар оролцогч 45 орны дунд 27 дугаар байрт жагслаа.

Монгол тамирчид чөлөөт бөх, сонгомол бөх, жүдо бөх, дугуй, бокс, жюү жицү, цахим спортын төрлүүдэд медаль хүртсэн бөгөөд медаль хүртсэн долоон төрлөөс дөрөв нь бөхийн төрөл байлаа.

Жүдочид медалийн ихэнхийг авч, сонгомол бөхөөр 52 жилийн дараах анхны Азийн наадмын медальтан төрөв. Жүдо бөхийн тамирчид 2014 оноос хойш Азийн наадмаас алт хүртэж байгаагүй бөгөөд энэ удаад 66 кг-ын жинд зодоглосон К. Ёолк Монгол Улсын төрийн дууллыг нэг удаа эгшиглүүлж, анх удаа алт авсан тамирчин болов.

Эмэгтэй сагсан бөмбөгийн баг 2014 оны Инчеоны наадмын шөвгийн наймд шалгарсан амжилтаа 12 жилийн дараа давтсан байна.

Азийн олимп нь дөрвөн жилд нэг удаа зохион байгуулагддаг бөгөөд энэхүү 16 хоногийн тэмцээн өнөөдрөөр өндөрлөлөө.

Мөн тэмдэглэхэд, 2023 оны Ханжөүгийн Азийн наадамд Монгол Улс хоёр алт, таван мөнгө, 13 хүрэл нийт 20 медаль хүртэн 45 орны дунд 23 дугаар байрт орж байв. Харин 2018 оны Жакартагийн Азийн наадамд таван алт, найман мөнгө, 11 хүрэл нийт 24 медаль хэлбэрээр 17 дугаар байрт жагсаж байжээ. 2014 оны Инчеоны наадамд Монгол Улс нэг алт, дөрвөн мөнгө, 12 хүрэл нийт 21 медаль хүртэн 16 дугаарт эрэмбэлэгдэж байв.