Дуучин Г.Ариунбаатарын хувийн бичлэгийг зөвшөөрөлгүй бичсэн нь хууль зөрчсөн гэж өмгөөлөгч анхаарууллаа

Өмгөөлөгч М.Хандармаа дуучин Г.Ариунбаатар эхнэр Б.Баярмаагаа тэврэн үнсэж байгаа бичлэгийг цонхны цаанаас бичиж тараасан талаар тайлбар өглөө. Тэрбээр бичлэг нь гаднаас хийгдсэн бөгөөд энэ нь хүний дүрсний эрхийг зөрчиж байгаа гэж онцлов.

Зөрчлийн тухай хуулийн 6.22 дугаар зүйлд зааснаар оршин суугчийн зөвшөөрөлгүйгээр орон байранд эсхүл гадна талаас орон байрны доторх орчны гэрэл зураг, дууны болон дүрсний бичлэг хийхийг хориглодог. Ийм зөрчил гаргасан тохиолдолд хүнийг хоёр зуун нэгжтэй, хуулийн этгээдийг хоёр мянган нэгжтэй тэнцэх хэмжээний төгрөгөөр торгох зохицуулалттай.

М.Хандармаа өмгөөлөгчийн хэлснээр, уг бичлэг эерэг агуулгатай байсан тул ямар нэгэн сөрөг үр дагавар гараагүй боловч хувь хүний эрхэд халдсан тохиолдолд хуулийн дагуу хариуцлага хүлээх ёстойг анхаарууллаа.