Засгийн газар газар тариалангийн бүсэд ажиллаж, шатахууны үнийн асуудлыг хэлэлцэв

Засгийн газрын гишүүд энэ амралтын өдрүүдэд газар тариалангийн бүсэд ажиллав. Энэ үеэр Аж үйлдвэрийн хөгжлийн сайд Г.Дамдинням шатахууны үнийн нөхцөл байдлын талаар мэдээлэл өглөө.

Тэрбээр он дуустал ОХУ-ын дотоодын үнээр шатахуун авах шийдэлд хүрсэн бөгөөд цаашид Санкт-Петербург хотод хэлэлцээрээ үргэлжлүүлэхээ мэдэгдэв. Зургаадугаар сард шатахууны үнийг тодорхой түвшинд бууруулах чиглэлд ажиллаж байгаа гэлээ.

Монгол Улсын хэмжээнд хаврын тариалалтад 7500 тонн дизель түлш шаардлагатай байдаг бөгөөд энэ хаврын тариалалтад 10 мянган тонн дизель түлшийг нэмэгдээгүй үнээр буюу литр тутамд 3400 төгрөгөөр олгосон байна.

Сайд Г.Дамдиннямын хэлснээр, хүнсний хангамж, ард иргэдийн стратегийн бүтээгдэхүүнийг дотоодоос хангах газар тариалангийн салбарыг дэмжихэд энэ арга хэмжээ томоохон дэмжлэг болсон гэж үзэж байна. Түүнчлэн тавдугаар сараас арванхоёрдугаар сар хүртэл хугацаанд иргэд, аж ахуйн нэгжүүдээс гарах 1.8 их наяд төгрөгийн дарамтыг бууруулж чадсан гэв.

Олон улсын байгууллагуудын мэдээлж буйгаар нөхцөл байдал ойрын хугацаанд тогтворжихгүй байж болзошгүйг онцолсон байна.