Засгийн газар Оюутолгойн хэлэлцээр болон эрчим хүчний салбарын шинэ шийдвэрүүдийг танилцууллаа

Засгийн газрын хуралдаанаар Оюутолгойн хэлэлцээртэй холбоотой шийдвэрүүдийг танилцууллаа. Аж үйлдвэр, эрдэс баялгийн сайд Г.Дамдиннямын мэдээлснээр, Ерөнхий сайдын захирамжаар байгуулагдсан хоёр ажлын хэсэг Оюутолгой төслийн хөрөнгө оруулалтын гэрээний зээлийн хүү болон менежментийн төлбөрийн асуудлыг хариуцан ажиллаж байна.

Сангийн сайд зээлийн хүүтэй холбоотой асуудлыг хариуцаж байгаа бол Г.Дамдинням менежментийн төлбөрийг бууруулах, засаглалыг сайжруулах чиглэлээр хэлэлцээрийг ахалж байна. Хэлэлцээр тасалдсан зүйлгүй, идэвхтэй, үр дүнтэйгээр явагдаж байгаа бөгөөд зээлийн хэлэлцээрийн долоон жилийн түгжээг арилгасан байна.

Цаашид хэлэлцээрийг үргэлжлүүлэн явуулж, Оюутолгойн гэрээний зээлийн хүү болон менежментийн төлбөрийг олон улсын жишигт нийцсэн хэмжээнд хүргэхээр ажиллаж байна. Мөн онцгой хэлэлцээрийн ажлын хэсэг байгуулагдаж, Монгол Улсын эрх ашгийг хангах шинэ хөрөнгө оруулалтын гэрээг байгуулахад ашигт малтмалын нөөц ашигласны төлбөрийг голчлон авч үзэх зарчим баримталж байна.

Эрчим хүчний сайд Б.Найдалаа Засгийн газрын хуралдаанаар эрчим хүчний салбарын зардлыг хамгийн багадаа 3 хувиар бууруулах шийдвэр гарсныг мэдээллээ. Мөн хэрэглэгчдэд зориулсан ухаалаг, ойлгомжтой төлбөрийн мэдээллийг харуулах системийг нэвтрүүлэхээр төлөвлөж байна.

Монгол Улсын Засгийн газар эрчим хүчний салбарыг эдийн засгийн хөгжлийн үндсэн суурь гэж үзэн, дулааны тоолуурын асуудлыг гурван сарын дотор шийдвэрлэхээр ажиллаж байна. Түүнчлэн таван эх үүсвэрт нээлттэй сонгон шалгаруулалтаар батарей хуримтлуур барихаар төлөвлөжээ. Өвлийн бэлтгэл ажлыг одооноос хангахад анхаарч байна.