ХХААХҮЯ-ны нүүлгэсэн шийдвэрийг УИХ гаргасан тул буцаах асуудлыг УИХ шийднэ

Хүнс, хөдөө аж ахуй, хөнгөн үйлдвэрийн сайд М.Бадамсүрэн Хүнс, хөдөө аж ахуй, хөнгөн үйлдвэрийн яамыг Дархан-Уул аймгаас Улаанбаатар хот руу буцаан нүүлгэх эсэх талаар тайлбар өглөө.

Тэрбээр яамыг Дархан-Уул аймагт нүүлгэсэн шийдвэрийг УИХ-ын гишүүд гаргасан бөгөөд өөрийн ажиллах үед яам хоёр газарт үйл ажиллагаа явуулж байсан гэв. Харьяа байгууллагуудын ихэнх нь Дархан-Уулд, харин Мал эмнэлгийн ерөнхий газар, Жижиг, дунд үйлдвэрлэлийн газар, Судалгаа хөгжлийн төв болон лабораториуд нь Улаанбаатарт байрладаг байна.

М.Бадамсүрэн УИХ дээр зарчмын зөрүүтэй санал дэмжигдэн яамыг нүүлгэсэн бөгөөд энэ шийдвэр нь хүний эрхэд нөлөөлсөн, судалгаа, тооцоо багатай байсан гэж үзэж байгаагаа илэрхийлэв.

Тэрбээр өмнөх сайдын байр сууринаас олон нийт, ажилтнуудын санал асуулга хийх ёстой байсан гэж тэмдэглэв. Яамны зарим хэсэг нийслэлд үлдсэн нь Засгийн газар, УИХ-тай харилцах үйл ажиллагаа шаардлагатай байсантай холбоотой гэв.

Ерөнхий сайд энэ асуудлаар “ХХААХҮЯ-ыг нүүлгэх шийдвэрийг УИХ-ын гишүүд гаргасан учраас буцааж авчрах асуудлыг УИХ л шийднэ” гэж мэдэгдсэн бөгөөд сайд М.Бадамсүрэн энэ шийдвэрийг дагаж ажиллах болно гэв.

Мөн яамны 60 гаруй албан хаагчийн орон сууцны урьдчилгааны 30 хувийг Хөдөө аж ахуйн биржийн хуримтлуулсан ашгаас гаргасан бөгөөд энэ нь албан хаагчдын орон сууцны асуудлыг шийдвэрлэхэд чиглэсэн байна.

Иймд Дархан-Уул аймагт ажиллаж байгаа албан хаагчид буцаад нүүх асуудалд санаа зовохгүйгээр ажлаа үргэлжлүүлж болох бөгөөд парламент буцааж нүүлгэх шийдвэр гаргавал нүүнэ гэв.