Америк-Украин-Оросын гурван талт яриа хэлэлцээ ахицгүй өндөрлөв
АНУ-ын зуучлалтайгаар Абу Даби хотод болсон Украин, Оросын төлөөлөгчдийн гурван талт яриа хэлэлцээ Бямба гарагт ямар нэг ахиц дэвшилгүй өндөрлөлөө. Уулзалтын дараа Украины ерөнхийлөгч Володимир Зеленский хэлэлцээний гол анхаарал дайныг зогсоох боломжит параметрүүдэд төвлөрч байсныг онцолсон байна.
АНУ-ын нэрээ нууцалсан албан тушаалтан дараагийн уулзалтыг ирэх долоо хоногийн Ням гарагт зохион байгуулах магадлалтайг мэдээлжээ. Талууд асуудлуудыг дэлгэрэнгүй ярилцсан бөгөөд үр дүнд хүрэх найдлага байгааг онцолсон байна.
2022 оны хоёрдугаар сард эхэлсэн дайнаас хойш анх удаа гурван талт яриа хэлэлцээ болсон бөгөөд уулзалтын үеэр Украины хотуудад Оросын агаарын довтолгоо үргэлжилж байлаа. Бямба гарагийн шөнө Киев болон Харьков хотууд олон зуун нисгэгчгүй онгоц, пуужингаар довтлогдсон байна.
Украины гадаад хэргийн сайд Андрей Сибига энэхүү халдлага нь хэлэлцээний ширээний орчинд сөргөөр нөлөөлж байгааг онцолсон бол Арабын Нэгдсэн Эмират Улсын засгийн газар яриа хэлэлцээ “бүтээлч, эерэг уур амьсгалтай” болсон, итгэлцлийг бэхжүүлэх арга замуудыг хэлэлцсэн гэж мэдэгдэв.
Трампын засаг захиргаа дайныг дуусгахын тулд эзлэгдсэн газар нутгаа Оросын талд шилжүүлэх нөхцөлийг Украины эрх баригчдад тулгаж байгаа талаар Давосын чуулганд хэлсэн байна. Гэвч Оросын албаныхны байр суурь тодорхой бус хэвээр байгаа бөгөөд Кремлийн хэвлэлийн төлөөлөгч Дмитрий Песков Донбассыг бүхэлд нь шилжүүлэх шаардлага хэвээр байгааг баталжээ.
Украины эрх баригчид Донбассын бүс нутгийг өгөхөөс татгалзаж байгаа бөгөөд Оросын тал дипломат арга зам мухардалд орвол дайнаа үргэлжлүүлэхэд бэлэн байгааг анхааруулсаар байна.
Бямба гарагийн шөнө болсон халдлагад Оросын арми 375 нисгэгчгүй онгоц, 21 пуужин ашиглан эрчим хүчний дэд бүтцүүдийг онилсон гэж Украины зэвсэгт хүчин мэдээлжээ. Халдлагад нэг хүн алагдаж, 30 гаруй хүн шархадсан бөгөөд Киев хотын цахилгаан, дулааны хангамж тасалдсан байна.