Дундговь аймаг халаалтын зуух шинэчилж, хог шатаах зуух барьж байна

Дундговь аймгийн засаг дарга С.Мөнхчулуунаас тодруулга авлаа. Тэрээр Ерөнхий сайд болон гишүүд аймаг, нийслэлийн засаг дарга, иргэдийн хурлын дарга нартай уулзаж, 2026 оны ажлуудыг ярилцан хамтран ажиллах санамж бичиг байгуулсан талаар мэдээлэв.

Уулзалтаар Ерөнхий сайд аймаг орон нутгийн эрх мэдэл, бие даасан байдлыг нэмэгдүүлэх, төсвийн давсан орлогоор хөрөнгө оруулалт хийх боломжийг бүрдүүлэх талаар ярьсан байна. Харин аймгийн засаг дарга нар суманд газрын асуудлыг шийдвэрлэхэд хүндрэлтэй байгааг онцолжээ. Суманд хашааны газар олгохын тулд Засгийн газрын зөвшөөрөл авах шаардлагатай байгаа нь асуудал үүсгэж байна.

Мөн халаалт, дулааны үнэ тарифыг 10 гаруй жил нэмэгдүүлээгүйтэй холбоотой орон нутгийн халаалтын компаниудын үйл ажиллагаа доголдох эрсдэл үүссэн байна. Цаашид халаалтаа хэвийн хангах боломжгүй болох эрсдэлтэй тул үүнийг шийдвэрлэх шаардлагатайг хэлэв.

10 аймаг БНСУ-ын Засгийн газрын хөнгөлөлттэй зээлээр дулааны станц барихаар гэрээ байгуулсан ч 2024 оноос хойш ажил удааширч, барилгын ажил 40 хувийн гүйцэтгэлтэй хэвээр байна. Энэ нөхцөл байдал нь аж ахуйн нэгж, иргэдийг өөрсдийн халаалтын зуухыг шинэчлэхээс татгалзахад хүргэж, орон нутгийн халаалтын асуудлыг хүндрүүлж байна.

Дундговь аймаг энэ жил өөрсдийн хүчээр халаалтын зуухнуудаа шинэчилж, хог шатааж дулаан боловсруулдаг зуух барьж байгаа бөгөөд ийм арга замаар асуудлаа шийдэхгүй бол хүлээгдэж буй дулааны станцын бүтээн байгуулалт саатсанаар нөхцөл байдал улам хүндрэх эрсдэлтэйг онцоллоо.