Пунцагийн Золзаяа Шүүхийн ерөнхий зөвлөлийн даргаар сонгогдлоо
2026-01-03 15:021min
Шүүхийн тухай хуулийн дагуу Шүүхийн ерөнхий зөвлөлийн даргыг сонгох хуралдаан болж, Пунцагийн Золзаяаг даргаар томилжээ. Тэрбээр шүүхийн шинэтгэлийг үргэлжлүүлэн ахиц дэвшил гаргахаа мэдэгдэв.
Монгол Улсын шүүхийн тухай хуулийн 76 дугаар зүйлийн 76.4-д зааснаар, Шүүхийн ерөнхий зөвлөлийн даргыг гишүүд дотроосоо нэг жилийн хугацаагаар олонхийн саналаар нууц санал хураалтаар зөвхөн нэг удаа сонгоно.
Ерөнхий зөвлөлийн даргын сул орон тоо гарснаас хойш 14 хоногийн дотор даргыг сонгох үүрэгтэй бөгөөд энэ дагуу Шүүхийн ерөнхий зөвлөлийн даргыг сонгох зөвлөлийн хуралдаан 2026 оны 01 дүгээр сарын 02-ны өдөр болж, гишүүн Пунцагийн Золзаяаг Шүүхийн ерөнхий зөвлөлийн даргаар сонгосон байна.
Шүүхийн ерөнхий зөвлөлийн дарга П.Золзаяа шүүхийн шинэтгэлийн бодлого, үйл ажиллагааг үргэлжлүүлж, бодитой ахиц дэвшил гаргах зорилготой ажиллахаа илэрхийлжээ.