Монгол Улс БНСУ-ын иргэдийн визийн чөлөөлөлтийн хугацааг 2026 он хүртэл сунгалаа

Засгийн газар өнгөрсөн долоо хоногийн ээлжит хуралдаанаараа 2026 оны арванхоёрдугаар сарын 31-ний өдрийг хүртэл БНСУ-ын иргэдийг Монгол Улсад жуулчлах визийн шаардлагаас чөлөөлөх хугацааг сунгасан байна. Энэ шийдвэр нь “Монголд зочлох жил” арга хэмжээний хүрээнд 2025 оны арванхоёрдугаар сарын 31-нийг хүртэл хүчинтэй байсан визийн чөлөөлөлтийн хугацааг сунгасан хэрэг юм.

Мөн энэ онд Монгол Улсад 30 хоногийн хугацаагаар жуулчлах зорилгоор ирэх 34 улсын иргэдийг визийн шаардлагаас чөлөөлсөн байна. Тус улсууд нь Австри, Бельги, Унгар, Грек, Дани, Испани, Итали, Латви, Литва, Лихтенштайн, Люксембург, Мальт, Нидерланд, Польш, Португал, Словак, Словени, Финланд, Франц, Хорват, Чех, Швед, Эстони, Норвеги, Исланд, Швейцарь, Болгар, Ирланд, Кипр, Румын, Монако, Их Британи, Австрали, Шинэ Зеланд орно.