УИХ-ын дарга Г.Занданшатар Монголын хөрөнгийн биржийн өнөөдрийн (2022.09.20) арилжааг нээж, хөрөнгийн зах зээлийн хөгжил шинэ шатанд гарсныг зарлаж, хүндэтгэлийн цан цохилоо.
Өнгөрсөн хугацаанд дотоодын эдийн засаг, банк санхүүгийн тогтвортой байдлыг хангах, хөрөнгийн зах зээлийг хөгжүүлэх зорилгоор тодорхой бодлого хэрэгжүүлж ажилласан нь зах зээлд үр нөлөөгөө үзүүлж, үнэт цаасны арилжаа 1,4 их наяд төгрөгт хүрч, Монгол улс олон улсад хамгийн өндөр өсөлттэй хөрөнгийн зах зээлээр тодорсон байдаг.
УИХ-аас баталсан “Зээлийн хүүг бууруулах стратеги“-ийн хэрэгжилт өндөр үр дүнтэй байгаа нь хөрөнгийн зах зээлийн өсөлтөд нөлөөлж чаджээ. Мөн УИХ-аас Банкны тухай хуульд нэмэлт өөрчлөлт оруулж, банкны компанийн хэлбэрийг өөрчлөн нээлттэй хувьцаат компани болгосноор хувь эзэмшигчдийн төвлөрөл саарч, санхүүгийн шинэ бүтээгдэхүүний тоо нэмэгдэж, хөрөнгийн зах зээлээр дамжуулан иргэд сул чөлөөтэй мөнгө хөрөнгөө арвижуулах боломж нээгдэж байна.
УИХ өнгөрсөн 4 дүгээр сард Төрийн өмчийг хуулийн этгээдийн хувьцааг 2022-2023 онуудад биржээр нээлттэй худалдах үндсэн чиглэлийг баталсан. Эхний ээлжинд 34 төрийн өмчийн хувьцааг нээлттэй худалдахаар болсны нэг нь Монголын хөрөнгийн бирж ХХК юм.
УИХ-ын дарга энэ үеэр хэлсэн үгэндээ хөрөнгийн зах зээл хөгжихгүйгээр зах зээлийн эдийн засаг төгөлдөршиж, төлөвшихгүй. Санхүүгийн зах зээлийн хоёр тулгуур баганын нэг нь хөрөнгийн зах зээл гэдгийг тодотгоод 2021 оны жилийн эцсийн байдлаар зах зээлийн үнэлгээ хөрөнгийн зах зээлийн хөгжлийн 30 жилийн түүхэнд анх удаа 5,98 их наяд төгрөгт хүрч, өмнөх оны мөн үетэй харьцуулахад 97,47 хувиар өссөн бол үнэт цаасны арилжаа 1,4 их наяд төгрөгт хүрч, өмнөх оны мөн үетэй харьцуулахад 21,6 дахин өссөнөөр олон улсад хамгийн өндөр өсөлттэй хөрөнгийн зах зээлээр Монгол Улс тодорсныг онцоллоо. Тэрбээр,
- “УИХ-аас хоёр жилдийн өмнө Зээлийн хүүг бууруулах стратегийг баталсан. Зээлийн хүүг бууруулахын тулд хөрөнгө оруулалтын бусад боломжит хувилбарууд буюу хувьцаа, бонд зэргийг өргөжүүлж, хөрөнгийн зах зээлийг хөгжүүлж байж, зээлийн хүү буурна. Гэвч сүүлийн хоёр жилд цар тахлын улмаас эдийн засаг ихээр хумигдлаа. Гадаад дотоод нөхцөл байдал ч нөлөөллөө. Энэ цаг үед сайн мэдээтэй байгаа газар нь Монголын хөрөнгийн бирж болж байна. Дэлхийн хамгийн өндөр өсөлттэй арилжаатай хөрөнгийн биржээр шалгарсан байна. Хөрөнгийн биржийн нийт арилжааны дүн 6 их наяд гаруйд хүрч өнгөрсөн оныхоос 98 хувиар өссөн. Үнэт цаасны хоёр дахь зээл хөгжиж, 32 төрлийн шинэ бүтээгдэхүүнээр хүрээгээ тэлжээ. Иргэдийн бизнесийн идэвхжил сэргэж байгаа зэргээр энэ салбар олон сайн мэдээтэй байна.
- Банкны салбарын реформыг УИХ-аас хуульчлан хэрэгжүүлж эхлээд байна. Мөн л зах зээлийн нөхцөл байдлаас шалтгаалж удаашралтай байгаа боловч банкууд олон нийтийн нээлттэй хувьцаат компани болох эхлэл тавигдлаа. Банкны зээлийн хүү буурахад төдийгүй олон нийтийн хараа хяналт, оролцоотой сайн засаглал бүрдэж, төлөвшихөд чухал үүрэг гүйцэтгэх юм.
- Төрийн өмчит компаниудын үйл ажиллагааг сайжруулах хамгийн сайн арга бол олон нийтийн хувьцаат компанийн хэлбэрт шилжүүлэх. Хамгийн анхны хөрөнгийн биржээр арилжаалсан төрийн өмчит компанийн сайн жишээ бол Монгол шуудан компани. Олон нийтийн хяналтад ороод үр ашиг нь илтэд сайжирсан. Бусад төрийн өмчит компаниуд ийм байдлаар олон нийтийн нээлттэй хувьцаат компани болж, хөгжүүлбэл үр ашиг нь сайжирна. Энэ ажил амжилттай хэрэгжвэл том дэвшил болно” гэсэн юм.
Түүнчлэн энэ үеэр Монголын хөрөнгийн биржийн гүйцэтгэх захирал Х.Алтай, Санхүүгийн зохицуулах хорооны дарга Д.Баярсайхан нар хөрөнгийн зах зээлийн талаар мэдээлэл өгч, Хөрөнгийн биржийн түүхэн үзвэрийн танхимыг УИХ-ын даргад танилцууллаа.
