УИХ-ын гишүүн Б.Саранчимэг 2021 оны арваннэгдүгээр сард Монгол Улсын Ерөнхий сайд Л.Оюун-Эрдэнэ болон тухайн үеийн Байгаль орчин, аялал жуулчлалын сайд Н.Уртнасан нарт хандаж хуш модны самрыг түүж бэлтгэхийг хориглох тухай шийдвэр гаргаж өгөхийг хүссэн албан бичиг хүргүүлж байв.
Тэгвэл энэ удаа дахин БОАЖ-ын сайд Б.Бат-Эрдэнэд хандаж албан бичиг хүргүүлжээ.
Уг албан бичигт “Монгол улсын “Байгаль орчныг хамгаалах тухай хууль”-ийн 15 дугаар зүйлийн 15.1.1, 15.1.2, 15.1.4 дэх заалт, “Ойн тухай хууль”-ийн 12 дугаар зүйлийн 12.1.1, 12.1.2, 12.1.5, 13.1.5 заалт болон Монгол Улсын Ерөнхийлөгчийн 2021 оны 10 дугаар сарын 04-ний өдрийн “Тэрбум мод” үндэсний хөдөлгөөнийг санаачлан өрнүүлэх талаар “Засгийн газарт чиглэл өгөх тухай” 58 тоот зарлигийг баримтлан ой мод үрээр тарьж ургуулах, иргэдийн хувийн хэрэгцээнээс бусад зорилгоор хуш модны самар түүж бэлтгэх, экспортлохыг урт хугацаагаар буюу 10 хүртэлх жилээр хориглох тухай асуудлыг нэн яаралтай шийдвэрлэж өгнө үү” гэжээ.
Монгол орны газар нутаг, унаган байгаль төрх, улс орныхоо ногоон тусгаар тогтнолыг хамгаалах, ялангуяа говийн бүст цөлжилтийг сааруулах, гадаргын усыг хуримтлуулах, усны эко системийг хамгаалах, сэргээх тал дээр онцгой анхаарч ажиллах хэрэгцээ, шаардлага байгаа. Энэ хүрээнд одоо байгаа ойн сан бүхий газар нутгийг хамгаалах, ой модыг нөхөн сэргээхэд хүний хүчин зүйлээс шалтгаалсан ой мод гэмтээх, хугалах, гал түймэр тавих зэрэг сөрөг нөлөөллийг бууруулах зорилгоор хуш модны самар түүх, бэлтгэх үйл ажиллагааг урт хугацаанд хориглох шаардлагатай байгааг албан бичигт дурдсан байна.
