Үндэсний статистикийн хорооны мэдээллээр 2021 оны III улирлын байдлаар уул уурхай, олборлолтын салбарт 57 804 хүн ажиллаж байна. Ажиллагчдын тоо 2020 оны мөн үеэс 7.6 хувиар өсжээ.
Энэ салбарт үйл ажиллагаа явуулж буй аж ахуйн нэгж, байгууллага 1127 байгаа аж. Үүнээс 655 нь туслах үйл ажиллагааны чиглэлийн компаниуд байна. Туслах үйл ажиллагаа үзүүлэгч компаниудын тоо 2021 онд бага зэрэг өссөн ч цар тахлын өмнөх үетэй харьцуулахад буурчээ.
Харин Монгол Улсад хөдөлмөр эрхэлж буй гадаадын 5753 ажилтан байна. Энэ нь 2020 оны мөн үеэс өссөн ч 2019 оныхоос 44 хувиар буурсан байна. Цар тахал дэгдсэнээр Монгол Улсад хөдөлмөр эрхлэх гадаад ажилтнуудын тоо эрс буурчээ.
Барилга болон уул уурхайн салбарт ажиллах гадаадын иргэдийн тоо хамгийн өндөр байна. Тухайлбал: уул уурхайн салбарт 1609 хүн буюу 28 хувь нь ажиллаж байгаа ажээ. Харин барилгын салбарт нийт гадаад ажилтнуудын 30 орчим хувь нь ажиллаж байна.
Уул уурхайн салбарын гол ажил олгогч гэгддэг “Оюу Толгой” компанид өнгөрсөн оны III улирлын байдлаар ойролцоогоор 14 мянган хүн ажиллаж байна. Үүнээс 96 хувь нь Монгол, үлдсэн нь буюу 560 нь гадаад улсын иргэд байгаа юм. Өөрөөр хэлбэл уул уурхай олборлолтын салбар дахь гадаад ажиллагчдын гуравны нэг нь “Оюутолгой” төсөл дээр ажиллаж байна.
