Афганистаны Засгийн газрын Хэвлэлийн албаны дарга Дава Хан Менапал наймдугаар сарын 6-ны Баасан гарагт Кабул хотод буудуулан амиа алджээ. Талибанчууд Дава Хан Менапалыг отолтод оруулж байгаад егүүтгэсэн талаар эх сурвалжууд мэдээлсэн байна. Цагдаагийн ажилтнууд Д.Менапал автомашинаасаа буух үедээ халдлагад өртсөн хэмээн мэдэгдээд байна.
Гэмт этгээдүүд хэргийн газраас зугтсан бөгөөд Талибаны хэвлэлийн төлөөлөгч Забихулла Мужахид хэвлэлд өгсөн ярилцлагадаа босогчид Дава Хан Менапалийг хөнөөсөн хэмээн мэдэгджээ. Талибанчууд сүүлийн хэдэн сар дараалан Афганистанд хүчээ авч байгаа бөгөөд АНУ, НАТО -гийн цэргүүд энэ сарын сүүлчээр Афганистанаас гарч дуусахад эрх мэдлээ тогтоосон газрын цар хүрээг тэлэх оролдогыг хийж байна. Талибанчууд Афганистаны өмнөд болон баруун хэсэгт орших мужийн төвүүдийг бүслэн авч сүүлийн үед ширүүн тулаан өрнүүлж байгаа юм.