Урлаг, Спорт

Автомашины азын сугалаатай, “Азийн казах курес”-ийн тэмцээн

Казах курес бөхийн насанд хүрэгчдийн Азийн аварга шалгаруулах тэмцээн энэ сарын 17-18-нд Монгол Улсад анх удаа болох гэж байна.

Монгол бөхийн өргөөнд зохион байгуулах тус тэмцээнийг эх орондоо зохион байгуулахын төлөө манай улс Узбекистан, Киргизтэй өрсөлдсөн юм. Улмаар Олон улсын казах курес бөхийн холбооныхон өнгөрсөн тавдугаар сард хуралдан, Азийн АШТ-ий эрхийг Монголд олгосон билээ.

Олон улсын казах курес бөхийн холбоо, Азийн казах курес бөхийн холбоотой хамтран зохион байгуулах тэмцээнд 11 орны 120 гаруй тамирчин зодоглоно. Азийн АШТ-д Монголоос зохион байгуулагч орны давуу эрх эдлэн жин тус бүрт хоёр, үнэмлэхүй жингийн тамирчинтай нийлээд улсын начин Б.Серик тэргүүтэй 17 бөх хүч сорино. Тэд ОУХМ Ч.Болдбаатарын удирдлаган дор бэлтгэлээ базааж байна.

Азийн АШТ-ий жин тус бүрт түрүүлсэн бөхийг нэг мянга, үзүүрлэсэн тамирчныг 500, хүрэл медаль хүртсэнийг нь 300 ам.доллароор шагнах аж. Харин үнэмлэхүй жинд түрүүлсэн бөх гурван мянган ам.долларын шагнал хүртэх нь. МҮОНРТ, SPS телевизээр шууд дамжуулах Азийн АШТ-д өндөр амжилт үзүүлсэн Монголын бөхчүүдээс ДАШТ-д зодоглох тамирчдыг сонгох юм байна.

Монгол тамирчид өнгөрсөн жил Азийн АШТ зодоглохдоо бүх жинд медаль (гурван алт, гурван мөнгө, хоёр хүрэл) хүртсэн. Эх орондоо түүнийгээ давтах, ахиулах том даалгавартай өрсөлдөх юм.

Тэмцээний тасалбар 1,500 ширхэг хэвлэгдсэн, 10,000 төгрөгийн үнэтэй. Тасалбарыг Монгол бөхийн өргөө, Спортын төв ордны нэг давхарт байрлах “Yawara shop”-оос худалдан авах боломжтой. Спортын хорхойтнуудад нэгэн өвөрмөц бэлэг задлахад, Азийн АШТ-ий азтай үзэгчийг “Приус-30” маркийн автомашинаар шагнах юм байна.

Байгуулагдаад жил гаруй болж буй Азийн казах курес бөхийн холбооны ерөнхийлөгчөөр Хөдөлмөрийн баатар, Олимпийн хүрэл медальт, Дэлхийн аварга Х.Цагаанбаатар ажилладаг. Монголд болох Азийн АШТ-д оролцох гадаадын болон Монголын тамирчдын онгоцны тийз, байрлах буудал зэрэг зардлуудыг Олон улсын казах курес бөхийн холбоо, Азийн казах курес бөхийн холбоо хариуцаж байгаа ажээ.

Казах курес бөхийн Азийн АШТ-д оролцох Монголын багийн бүрэлдэхүүн:

55 кг: Даваанямын Бөхчулуун, Амарсанаагийн Хатансайхан

60 кг: Пүрэвдагвын Алтанбагана, Батцэрэнгийн Энэбиш

66 кг: Батзаяагийн Эрдэнэбаяр, Болдын Самбууням

74 кг: Санжмятавын Баяртүвшин, Бат-Эрдэнийн Пүрэвдаваа

82 кг: Баянмөнхийн Гаажадамбa, Батмөнхийн Алтансүх

90 кг: Батнасангийн Тэнгис, Эрдэнэтогтохын Түмэннасан

100 кг: Дэлгэрийн Цэрэнням, Ганын Түвшинжаргал

100+ кг: Хутагийн Цогтгэрэл, Бередмуратын Серик

Үнэмлэхүй жин: Болдпүрэвийн Өнөржаргал

Багийн ахлагч: Г.Түвшинжаргал

Дасгалжуулагч: Ч.Болдбаатар

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close