БНСУ-ын виз авахаар материалаа өгөөд татгалзсан хариу авсан иргэдэд БНСУ-ын ЭСЯ-ны Консулын хэлтэс тайлбар бүхий хуудас олгодог байсныг 2017 онд зогсоож, тухайн иргэний паспортын арын хуудсан дээр улаан өнгөөр он, сар, өдөр болон тоо дардаг болсны хамгийн арын тоо нь виз олгохыг татгалзсан тайлбар юм байна.
Жишээ нь доорхи зурган дээр 2017.11.27-07. гэж байгаа нь уг иргэний визэнд татгалзсан хариу өгсөн огноо бөгөөд “07” нь “Зорчих зорилго тодорхойгүй байсан” гэсэн шалтгааны тайлбар ажээ.
Иймээс та бүхэнд виз олгохоос татгалзсан шалтгааны тайлбарыг хүргэе!
1. Паспортны хүчинтэй хугацаа дууссан.
2. Хилийн Шалган Нэвтрүүлэх Алба (БНСУ-ын)-ны тухай хуулийн 11-р зүйлийн 1 (хилээр орох эрх нь хаагдсан)-д хамрагдсан.
3. Өмнө нь БНСУ-д визний хугацаа хэтрүүлж байсан буюу оршин сууж байхдаа хууль зөрчсөн.
4. Зорчих зорилгоо тодорхойлсон бичиг баримтаа бүрдүүлээгүй.
5. БНСУ-ын хилийн албанаас тогтоосон оршин суух нөхцөлийг хангаагүй.
6. а) Хуурамч материал бүрдүүлж өгсөн (орох эрхийг жилээр хаасан).
b) Ажлын газрын тодорхойлолтын үнэн зөв эсэхийг батлах боломжгүй.
c) Аман болон бичгийн мэдүүлэг бодит байдалтай зөрүүтэй байсан, үнэн зөвийг батлах боломжгүй.
d) Бүрдүүлсэн бусад материалын үнэн зөв эсэхийг батлах боломжгүй.
7. Зорчих зорилго тодорхойгүй байсан.
8. Төлбөрийн чадвар зэрэг нь визний хугацаандаа буцаж ирэх баталгаа болж чадаагүй (Хууль бусаар оршин суух, ажиллах магадлал өндөр)
9. Уригч тал нь хүн урих эрхгүй байсан. Уригч талын өмнө нь урьсан хүмүүсээс тус улсад хууль бусаар үлдсэн тохиолдол гарсан.
10. Уригчтайгаа төрөл садан болон ямар холбоотойгоо баталж чадаагүй.
11. Утсаар холбогдох боломжгүй байсан. Нэмэлтээр хүссэн материалыг бүрдүүлж өгөлгүй өөрийн хүсэлтээр паспортаа буцааж авсан.
