Цагдаагийн байгууллага малын хулгайн эрсдэл нэмэгдэж байгааг анхаарууллаа

Намар, өвлийн улиралд малын хулгайн гэмт хэргийн эрсдэл нэмэгддэг тул цагдаагийн байгууллагаас малчдыг сонор сэрэмжтэй байхыг анхааруулж байна.

Малаа удаан хугацаагаар хариулгагүй, эзэнгүй орхих, малын им, тамга болон бүртгэл тэмдэглэгээг дутуу хийх нь хулгайд өртөх эрсдэлийг нэмэгдүүлдэг байна.

Сүүлийн үед Завхан аймагт гурван иргэн бүлэглэн хоёр азарганд хамаарах 57 адуу, Хөвсгөл аймагт хоёр иргэн 35 сарлагийн үхэр хулгайлсан хэргийг цагдаагийн алба хаагчид илрүүлжээ. Одоогоор эдгээр хэргүүдэд мөрдөн шалгах ажиллагаа үргэлжилж байна.

Цагдаагийн байгууллагын мэдээлснээр малын хулгайчид ихэвчлэн малыг бэлчээрээс тууж, тээврийн хэрэгсэлд ачих эсвэл бэлчээр дээр нь нядлах аргаар хулгайлдаг байна. Мөн бүлэглэн, урьдчилан тохиролцож гэмт хэрэг үйлдэх тохиолдол ч илэрчээ.

Тиймээс малчид малаа тогтмол хариулах, удаан хугацаагаар эзэнгүй орхихгүй байх хэрэгтэй гэж зөвлөлөө. Мөн малын им, тамга, зүс, нас, хүйс зэрэг онцлог шинжийг бүртгэж зурагжуулах нь хулгайд алдсан малын эрэн сурвалжлах болон танихад чухал ач холбогдолтой юм.

Мал худалдах, шилжүүлэх, тээвэрлэх үед гарал үүслийн гэрчилгээ болон холбогдох бичиг баримтыг бүрдүүлэхийг албадаж байна.

Сэжигтэй хүн болон тээврийн хэрэгслийн хөдөлгөөн ажиглагдах эсвэл мал хулгайлах гэмт хэргийн талаар мэдээлэл авсан тохиолдолд цаг алдалгүй цагдаагийн байгууллагын 102 дугаар дугаарт мэдэгдэхийг зөвлөв.

Эрүүгийн хуулийн 17.12 дугаар зүйл зааснаар бусдын малыг хулгайлсан тохиолдолд зургаан сараас таван жил хүртэл хугацаагаар зорчих эрхийг хязгаарлах эсвэл хорих ял оноодог. Хүндрүүлэх нөхцөлтэй үйлдсэн бол хорих ял хоёр жилээс найман жил; малын хулгайг байнга үйлдэж амьдралын эх үүсвэр болгосон, эсвэл зохион байгуулалттай бүлэг үйлдсэн бол таван жилээс арван хоёр жилийн хорих ял оноодог.