Дизель түлшний үнэ нэмэгдэх нь уул уурхай ба хэрэглэгчдэд нөлөөлнө

Өнгөрсөн долоо хоногт АИ-92 шатахууны үнэ 500-560 төгрөгөөр нэмэгдэж, литр тутамд 3600 төгрөгт хүрсэн байна.

Шатахууны нийлүүлэлт одоог хүртэл хэвийн горимдоо шилжээгүй бөгөөд иргэд дугаарлан шатахуун авахыг хүлээсээр байна.

Түүнчлэн өвлийн дизель түлшний үнэ 1000 төгрөгөөр нэмэгдэхээр болсон бөгөөд одоогоор нэг литр дизель түлш 4,185 төгрөгийн үнэтэй байна.

Энэ үнэ нь өмнөх оны мөн үеэс 40 хувиар өссөн дүн бөгөөд нэмэлт 1000 төгрөгөөр өсвөл дизель түлшний нэг литрийн үнэ 5,185 төгрөгт хүрнэ.

Энэ үзүүлэлт нь өмнөх оноос 70 гаруй хувиар өссөн гэсэн үг юм.

Дизелийн үнэ өсөх нь уул уурхайн салбарт томоохон нөлөө үзүүлдэг.

Дизель түлш хөдөө аж ахуй, уул уурхайд голлон хэрэглэгдэж, том оврын машины түлшний зардалд чухал байр суурь эзэлдэг.

Уурхайн машин техник, нүүрс тээврийн ачааны машин бүгд дизелээр ажилладаг тул шатахууны үнэ нэмэгдсэнээр үйл ажиллагааны зардал өсдөг.

Уул уурхайн бүтээгдэхүүнүүд нь олон улсын зах зээлийн үнийн дагуу борлуулагддаг учраас шатахууны үнэтэй холбоотой зардлын өсөлтийг борлуулалтын үнэд шууд тусгаж чадахгүй байна.

Иймээс зардал нэмэгдсэн ч ашгаа бууруулах байдлаар зохицуулалт хийхэд хүрдэг байна.

Мөн дизель түлшний үнийн өсөлт нь орон нутгийн бага орлоготой айл өрх, малчид, жижиг тээвэрлэгчид, нийтийн тээвэр болон түүнд тулгуурласан хэрэглэгчдэд шууд нөлөөлөх юм.