Орон сууцны залилангийн асуудлыг шалгах ажлын хэсгийн ээлжит хуралдаан боллоо

Орон сууцны залиланд өртсөн иргэдийн асуудлыг шалгах Ажлын хэсгийн ээлжит хуралдаан 2024 оны наймдугаар сарын 20-нд болж, хохирлыг барагдуулах болон иргэдийг давхар захиалгын гэрээнд өртөхөөс урьдчилан сэргийлэх арга хэмжээний талаар хэлэлцэв.

Ажлын хэсэг байгуулагдсанаас хойш 452.4 сая төгрөгийн дөрвөн гүйцэтгэх баримт бичгийг дуусгаж, дөрвөн иргэний орон сууцны өмчлөх эрхийн гэрчилгээг гаргуулсан байна.

Цагдаагийн байгууллагад орон сууцны захиалгын гэрээтэй холбоотойгоор 3111 иргэнд 107.7 тэрбум төгрөгийн хохирол учруулсан 173 хэрэг шалгагдаж байна.

Мөн орон сууц барих захиалгын гэрээ байгуулан иргэдийг залилсан 14 аж ахуйн нэгжийн удирдлага болох 21 этгээдийн хөрөнгийн мэдээллийг шалгажээ. Мөрдөн шалгах ажиллагааны хүрээнд тэдгээр этгээдүүд болон хамаарал бүхий 363 иргэний нэр дээр бүртгэлтэй 823 үл хөдлөх хөрөнгө, 226 газар эзэмших эрх, 102 автомашин байгааг тогтоосон байна.

Түүнчлэн орон сууцны захиалга авч эхэлснээс хойш өмчлөх, эзэмших эрх үүссэн 250 үл хөдлөх хөрөнгө, 132 газар эзэмших эрх, 53 автомашины хөрөнгийн эх үүсвэрийг тодорхойлох чиглэлээр мөрдөн шалгах ажиллагаа явуулж байна.

Ажлын хэсгээс орон сууцны залилантай холбоотой хамгийн олон хохирогчтой 14 компанийн хэргийг шуурхай шийдвэрлэвэл нийт хэргийн 60 орчим хувийг шийдвэрлэх боломжтой гэж үзжээ.

Шүүхийн шийдвэр гүйцэтгэх байгууллагаас орон сууцны залилантай холбоотой 67.2 тэрбум төгрөгийн 89 төлбөр төлөгч, хуулийн этгээдийн 1135 гүйцэтгэх баримт бичигт шийдвэр гүйцэтгэх ажиллагаа явуулж байна.

Шийдвэр гүйцэтгэх ажиллагааны хүрээнд 12 хуулийн этгээдийн 18.7 тэрбум төгрөгийн 259 гүйцэтгэх баримт бичигт нийт 226 үл хөдлөх, 14 хөдлөх хөрөнгийн захиран зарцуулах эрхийг түдгэлзүүлэн битүүмжилжээ.

Харин долоон хуулийн этгээдийн 21.2 тэрбум төгрөгийн 28 гүйцэтгэх баримт бичигт нийт 41 тэрбум төгрөгийн үнэлгээтэй 14 үл хөдлөх хөрөнгөд үнэлгээ тогтоосон байна.

Мөн 19 хуулийн этгээдийн 21.1 тэрбум төгрөгийн 434 гүйцэтгэх баримт бичгийн хүрээнд нийт 26 дуусаагүй орон сууц, барилгыг тогтоосон байна.

Цаашид иргэдийн захиалсан орон сууцыг давхардуулан борлуулах, захиалгын гэрээг давхар байгуулах эрсдэлийг бууруулах зорилгоор түр журам боловсруулж байна. Уг журмаар захиалсан орон сууц, талбайн мэдээллийг бүртгэх, урьдчилсан тэмдэглэл хийхээс гадна иргэд өөрийн мэдээллийг нээлттэй шалгах боломж бүрдүүлэхээр төлөвлөжээ.

Одоогийн зохицуулалтаар нийтийн зориулалттай дуусаагүй барилгыг бүртгүүлэх нь сайн дурын шинжтэй тул бүх захиалгын гэрээг бүртгэх боломжгүй байна. Харин дуусаагүй барилгаар бүртгэлтэй тохиолдолд урьдчилсан тэмдэглэл хийх боломжтой юм.

Ажлын хэсэг орон сууцны залилантай холбоотой хамгийн олон хохирогчтой 14 компанийн хэргийг шуурхай шийдвэрлэвэл нийт хэргийн 60 орчим хувийг шийдвэрлэх боломжтой гэж дүгнэжээ.

Иймд хохирлыг барагдуулах, холбогдох аж ахуйн нэгжүүдийн нуугдмал хөрөнгийг илрүүлэх, шийдвэр гүйцэтгэх ажиллагааг эрчимжүүлэхийн зэрэгцээ орон сууц захиалгын харилцааг зохицуулсан эрх зүйн орчныг боловсронгуй болгоход анхаарч ажиллахаар болсон байна.