Бүх цэргийн наадамд аймгийн хурц арслан Даваасүрэнгийн Алтанцоож түрүүлэв

Цэргийн цол, чимэг олгох 35 дахь удаагийн “Бүх цэргийн наадам 2026” аймаг, цэрэг, сумын цолтой болон залуу 256 бөхийн барилдаан өчигдөр боллоо.

Хэнтий аймгийн Өмнөдэлгэр сумын харьяат, “Алдар” спорт хороо, ЗХ-014 анги, Юү Эл И ХХК, Бор-Өндөрийн уулын баяжуулах үйлдвэр, Эбэг ХХК, “Хан Хэнтийн Аварга” дэвжээний бөх, аймгийн хурц арслан Даваасүрэнгийн Алтанцоож түрүүлсэн байна. Тэрээр “Бадрангуй” чимэг хүртжээ.

Архангай аймгийн Хотонт сумын харьяат, “Хилчин” спорт хороо, Ажнай корпораци, “Бөхбилэгт” дэвжээний бөх, аймгийн начин Батхуягийн Гончигсүрэн үзүүрлэж “Цэргийн заан” цол хүртсэн байна.

Их шөвөгт Дундговь аймгийн Эрдэнэдалай сумын харьяат, “Алдар” спорт хороо, ЗХ-034 анги, АПУ ХК-ийн бөх, аймгийн хурц арслан Н.Амгаланбаатар “Хичээнгүй” чимэг, Хөвсгөл аймгийн Их-Уул сумын харьяат, “Сүлд” спорт хороо, Азийн Идэр Цамхаг ХХК, “Хөвсгөлийн Хүчтэн” дэвжээний бөх, аймгийн арслан П.Хүрэлбаатар “Цогт” чимэг тус тус хүртжээ.

Дунд шөвөгт аймгийн арслан Г.Мөнхбаяр “Өлзийт”, аймгийн арслан Ө.Батсуурь “Өсөх”, аймгийн арслан Б.Цагаанбанди “Өсөх”, аймгийн харцага Б.Ренчинжүгдэр “Өсөх” чимэг тус тус нэмсэн гэж Батлан хамгаалах яамнаас мэдээлэв.