Авлигын хэргүүдийг шүүхээр шийдвэрлэх ажиллагаа үргэлжилж байна

Прокурорын байгууллагаас энэ оны гуравдугаар сарын 25-ны өдрийн байдлаар Эрүүгийн хуулийн 22 дугаар бүлэгт хамаарах авлигын гэмт хэрэгтэй холбоотой нийт 50 хэргийг шүүхээр шийдвэрлүүлжээ. Эдгээрээс 37 нь эрх мэдэл, албан тушаалын байдлаа урвуулан ашигласан, 13 нь хахууль авах, өгөхтэй холбоотой хэрэг байв.

Нийслэлийн прокурорын газраас 2026 оны гуравдугаар сарын 16-20-ны хооронд анхан шатны шүүхээр 16 хүнд холбогдох 4 хэргийг шийдвэрлэж, гэм буруутай этгээдүүдэд эрүүгийн хариуцлага оногдуулсан байна.

Тухайлбал, Сэлэнгэ аймгаас Улаанбаатар руу мод тээвэрлэх явцдаа хяналтаас зайлсхийх зорилгоор албан тушаалтнуудад мөнгө өгсөн иргэнд торгууль ногдуулж, нийтийн албанд ажиллах эрхийг нь хязгаарласан бол холбогдох албан тушаалтнуудад илүү өндөр хэмжээний торгууль, эрх хасах ял оногдуулжээ.

Бүртгэлийн байгууллагын ажилтнууд иргэдийн иргэний үнэмлэхийг хууль бусаар гаргасан хэрэгт хамтран оролцсон нь тогтоогдож, шүүхээс тэдэнд нийтийн албанд ажиллах эрхийг тодорхой хугацаагаар хасаж, мөнгөн торгууль ногдуулсан байна.

Татварын байгууллагын зарим албан тушаалтнууд татварын дүнг бууруулан бүртгэл үүсгэж, өөрсдөдөө болон бусдад давуу байдал бий болгосон хэрэгт буруутгагдаж, шүүхээс зорчих эрхийг хязгаарлах болон нийтийн албанд ажиллах эрхийг хасах ял оногдуулжээ.

Ийнхүү сүүлийн хугацаанд авлигын шинжтэй хэргүүдийг шүүхээр шийдвэрлэх ажил үргэлжилж, холбогдох этгээдүүдэд хариуцлага тооцож байгаа талаар эх сурвалжууд мэдээлж байна.