Ж.Ч.Х-гийн 185 сая төгрөгийн төлбөрийн маргаан шүүхээр шийдвэрлэгдэв

БНСУ-ын иргэн Ж.Ч.Х нь Монгол Улсын иргэн Н.Э-ээс ашигт малтмалын тусгай зөвшөөрөл худалдан авах талаар тохиролцож, 2023 онд урьдчилгаа болгон 185 сая төгрөгөөр “Тоёота 4Runner” маркийн машинаа Н.Э-ийн нэр дээр шилжүүлэн өгсөн байна. Гэвч талууд хоорондоо тусгай зөвшөөрөл худалдан авах гэрээ байгуулаагүй байжээ.

Н.Э нь Солонгост өгсөн машиныг буцаан авахыг хүссэн ч Ж.Ч.Х “185 сая төгрөгөөр надад зарчих, мөнгийг удахгүй шилжүүлнэ” гэж хэлсэн ч төлбөрийг өгөөгүй тул Н.Э шүүхэд хандсан байна.

Анхан шатны шүүхийн шийдвэрээр Ж.Ч.Х нь машины өмчлөл, эзэмшил, ашиглалтыг хүлээн зөвшөөрсөн тул Иргэний хуулийн дагуу 185 сая төгрөгийг нэхэмжлэгчид олгох нь зүйтэй гэж үзжээ. Гэвч Ж.Ч.Х давж заалдсан байна.

Давж заалдах шатны шүүх талуудын хооронд бичгээр болон амаар худалдах-худалдан авах гэрээний гол нөхцөл тохиролцоог нотолж чадаагүй гэж үзсэн бөгөөд харилцан ойлголцлын санамж бичигт машиныг барьцаанд өгөх тухай тусгасан нь гэрээний харилцаа үүссэнийг батлахгүй гэж дүгнэжээ. Ж.Ч.Х машиныг 2023 оны 12 дугаар сарын 18-наас хойш эзэмшиж байгаа ч гэрээний дагуу хүлээн авснаа нотолж чадаагүй тул үндэслэлгүй хөрөнгөжсөн гэж үзэн, Н.Э-д машины үнийг буцаан шаардах эрх олгосон байна. Ж.Ч.Х дахин эсэргүүцэн хяналтын шатны шүүхэд хандсан байна.

Улсын дээд шүүх 2026 оны 1 дүгээр сарын 27-нд хэргийг хянаж, Ж.Ч.Х хариу тайлбар ирүүлээгүй байна. Түүний өмгөөлөгч машиныг буцаан өгөх эсвэл үнийг бууруулж 130 сая төгрөг төлөх санал гаргасан ч үүнийгээ нотолж чадаагүй юм.

Шүүхийн эцсийн шийдвэрээр анхан шатны шүүхийн шийдвэрийг хэвээр үлдээж, худалдах-худалдан авах гэрээний харилцаа үүссэн гэж үзэн, Ж.Ч.Х-аас 185 сая төгрөгийг нэхэмжлэгчид олгуулах нь зүйтэй гэж дүгнэжээ.