Японы Уэно амьтны хүрээлэнгийн хоёр хулсны баавгайг БНХАУ руу буцаана
2024 оны нэгдүгээр сарын 27-нд Японы Токио хотын Уэно амьтны хүрээлэнгээс хоёр хулсны баавгайг БНХАУ руу буцаахаар болжээ. Ингэснээр Япон улс 1972 оноос хойш анх удаа хулсны баавгайгүй болох юм.
Өнгөрсөн ням гарагт Уэно амьтны хүрээлэнд хоёр ихэр баавгайг үдэн гаргах ёслолд олон мянган хүн цугласан бөгөөд япончууд эдгээр баавгайг харахын тулд гурван цаг гаруй дараалалд зогссон байна. Эдгээр баавгай 2021 онд Токиогийн амьтны хүрээлэнд төрсөн ч БНХАУ-ын өмчид тооцогддог бөгөөд бэлэглэсэн баавгай болон тэдний зулзага нь БНХАУ-ын өмч байх зарчмыг баримталдаг аж.
БНХАУ 1949 оноос хойш хулсны баавгайг бусад орнуудад найрсаг харилцааны бэлгэдэл болгон шилжүүлдэг бөгөөд үүнийг “панда дипломат ажиллагаа” гэж нэрлэдэг. Хулсны баавгай хүлээн авсан улс жил бүр хос баавгайн төлөө нэг сая ам.долларын төлбөр төлдөг бөгөөд БНХАУ харилцаа муудах тохиолдолд баавгайгаа буцаан авах эрхтэй байдаг.
Ийнхүү мягмар гарагийн орой хоёр баавгай онгоцоор Сычуань муж руу хүргэгдэхээр төлөвлөгдсөн байна.
Япон улс анх 1972 онд хулсны баавгай бэлгэнд авч, энэ нь хоёр орны харилцаа тогтворжсоны илрэл байв. Гэвч саяхан Японы Ерөнхий сайд БНХАУ Тайвань руу халдвал Японы зэвсэгт хүчин оролцохоор болсныг мэдэгдсэн нь хоёр орны харилцааг хурцадмал болгосон юм. Үүний дараа БНХАУ Японы эрх баригчдыг уучлалт гуйхыг шаардсан ч үр дүнгүй болж, Японы ховор металлын бүтээгдэхүүн экспортлох болон далайн бүтээгдэхүүн импортлохыг хориглосон билээ. Энэ удаад дипломат ажиллагааны нэг хэсэг болох хулсны баавгайнуудаа буцаахаар шийдсэн байна.