Улаанбаатар хотод шинээр хашаа тэлж, гудамж сунгахыг хориглов

Улаанбаатар хотын түгжрэлийг бууруулах зорилгоор хотын захирагч Х.Нямбаатар мэдээлэл хийлээ. Одоогийн байдлаар хотын түгжрэл одоогийнхоос илүү муудахгүй гэж үзэж байна. Түгжрэлийг бууруулах хүрээнд шинээр автомашины дугаар олгохыг зогсоож, хуучин дугаарыг шилжүүлэн худалдан авах хэлбэрээр зохицуулж байна.

Хотын төвийн зургаан дүүрэгт иргэдэд олгох 0.07 га газрыг олгохгүй бөгөөд шинээр хашаа тэлж, гудамж сунгахыг хориглосон байна. Туулын хурдны замыг 2027 оны наадмаас өмнө нээхээр төлөвлөж байгаа бөгөөд энэ зам нээгдсэний дараа түгжрэл 15-20 хувиар буурах төлөвтэй байна.

Мөн тойрог хурдны замын төлөвлөлтийг хийж, гүйцэтгэгчийг сонгон шалгаруулах олон улсын нээлттэй тендерийг 3 дугаар сарын 1-нд зарлахаар бэлтгэж байна. Трамвай төслийн санхүүжилтийг энэ оны нэгдүгээр сард бүрдүүлэхээр ажиллаж байна.

Дулаан хангамжийн асуудлаар дотоод бондын эргэн төлөлт ирэх оны нэгдүгээр хагаст дуусах бөгөөд нийт 800 тэрбум төгрөгийн дотоод бонд гаргасан байна. Бөөрөлжүүтийн станцын өр төлбөрийг төлөх график төлөвлөгөөний дагуу 2027 оны зургаадугаар сарын 1-нд дуусгахаар ажиллаж байгаа бөгөөд энэ арга хэмжээний үр дүнд энэ өвөл Улаанбаатар хотод тог тасралгүй өвөлжиж байна. Дулааны цахилгаан станц 5 (ДЦС 5) 2027 онд ашиглалтад орох юм.