Х.Булгаа: Нэгдүгээр хорооллын арын болон Баянхошуу, Баруунсалааны уулзвар хүртэлх авто замыг шинэчлэх ажлын явц 15 хувьтай байна

Нэгдүгээр хорооллын арын 2.7 км авто зам, Баянхошуу буюу Үйлдвэрчний эвлэлийн гудамжны 5.6 км авто замыг цогц, гудамж замын жишиг байдлаар өргөтгөн шинэчлэх ажлын явц 15 хувьд хүрчээ.

Дэлхийн банктай хамтран хэрэгжүүлж байгаа эдгээр төсөл нь явган зам, унадаг дугуйн зам, авто зам, ногоон байгууламж, ус ихээр тогтдог хэсэгт ус зайлуулах шугам сүлжээ, явган хүний гүүрэн гарц, тэмдэг тэмдэглэгээ, хурд сааруулагчийг суурилуулах бөгөөд 2026 оны аравдугаар сард нийт ажлыг дуусгахаар төлөвлөжээ.

Энэ тухай “Улаанбаатар хотын тогтвортой авто зам, тээвэр” төслийн зохицуулагч Х.Булгаа “Дээрх замуудад ус ихээр тогтдог хэсгүүд байгаа учраас иж бүрэн ус зайлуулах системийг барина.

Өнөр хорооллын арын зам, Геологийн төв лабораториос Баянхошуу, Баруунсалааны салдаг уулзвар хүртэлх уг авто замуудыг Монгол Улсдаа жишиг байдлаар шинэчилнэ. Төслийн бас нэг онцлог нь байрны гаднах орцноосоо эхлээд явган хүний зам үргэлжилнэ” гэж танилцуулав.

Төслийг гүйцэтгэгч “Макс Рөүд” ХХК-ийн захирал Ц.Балдангомбо “Өнөр хорооллын цогц гудамж замын төслийн ажил 15.9 хувийн гүйцэтгэлтэй байна. Өнгөрсөн зургаадугаар сард ажил эхэлсэн боловч бэлтгэл ажил, зураг төслийн өөрчлөлтүүд орсон нь ажлын явцад нөлөөлсөн.

Баянхошуунд хөрс солих ажлуудыг нэмэлтээр хийх хэрэгтэй болсон. Хотын шугам сүлжээтэй уялдуулж ажлаа төлөвлөх хэрэгтэй байгаа юм. Энэ жил нийт төслийн 50 хувийг гүйцэтгэх төлөвлөгөөтэй” гэлээ.

Цогц гудамж замын зураг төслийг Финланд улсын Финнок компани боловсруулжээ.