Улсын дээд шүүхэд энэ сарын 14-ний өдөр хар тамхитай холбоотой дөрвөн хэргийг хэлэлцжээ. Энэхүү хэргүүдэд 19-28 насны залуус холбогдсон бөгөөд тэд Эрүүгийн хуулийн 20.7 дугаар зүйлийн 1 дэх хэсэгт заасан Мансууруулах эм, сэтгэцэд нөлөөт бодис хууль бусаар олж авсан, бэлтгэсэн, ашиг олох зорилгогүйгээр хадгалсан гэмт хэрэг үйлдсэн байна. Тухайлбал:
– 28 настай Д нь 2,6 грамм өвсийг худалдаалах зорилгогүйгээр хууль бусаар түүж бэлтгэн 3 хоног биедээ буюу халаасандаа хадгалсан үйлдэлдээ 1 жилийн хорих ял, 25 настай Г.Б, 24 настай Ч.Б нар нь тэнсэх хугацаандаа 67 грамм хар тамхины төрлийн ургамлыг түүж байгаад газар дээрээ баригдсан учир ялыг нэгтгэж тус бүр 3 жил 6 сарын хорих ял оноосон анхан болон давж заалдах шатны шүүхийн шийдвэрийг хэвээр үлдээжээ.
-18 настай Э нь 115 грамм хар тамхины төрлийн ургамлыг хууль бусаар түүж бэлтгэсэн хэрэгт шүүхээс 1 жилийн хорих ял оногдуулж, хамт хэрэг үйлдсэн 18 настай М-д тэнсэх, мөн 8,8 грам хар тамхины төрлийн ургамлыг хууль бусаар түүж бэлтгэсэн 21 настай Х, О нарын хэргийг тус тус тэнсэж шийдвэрлэснийг биечлэн эдлүүлэх нь зүйтэй гэсэн прокурорын эсэргүүцлийг үндэслэн дээрх хоёр хэргийг дахин хэлэлцүүлэхээр Эрүүгийн хэргийн анхан шатны шүүхэд буцаасан байна.
Өнгөрсөн долоо хоногт Хяналтын шатны шүүхээр 1,6 грамм хар тамхины төрлийн ургамлыг нийтийн орон сууцны орцны паарны ард хадгалсан шүүгдэгч Ц-г мансууруулах эм, сэтгэцэд нөлөөт бодис хууль бусаар биедээ хадгалсан, бусдад өгсөн хэргээр 2 жилийн хорих ял оноосон анхан шатны шүүхийн шийдвэрийг хэвээр үлдээжээ.
Хар тамхины хэрэгт ихэвчлэн залуус өртөж байгаа төдийгүй, шүүхээс шийдэж байгаа хэргүүдийг харахад 1 грамм эсвэл 10 грамм байхаас үл хамаарч хар тамхи, мансууруулах төрлийн өвс ургамлыг түүж бэлтгэх, хадгалахад хүлээлгэх хуулийн хариуцлага нь чанга, биеэр эдлэх ял оногдуулсан байна. Тиймээс энэ төрлийн гэмт хэрэгт холбогдохгүй байхыг Улсын Ерөнхий Прокурорын газрын Олон нийттэй харилцах албанаас сэрэмжлүүлж байна.