Нийслэлийн өсвөр насны хүүхэд залуучуудыг спортод дур сонирхолтой болгох, спортоор хичээллэх боломжийг нэмэгдүүлэхэд дэмжлэг үзүүлэх зорилгоор нийслэлийн Засаг дарга бөгөөд Улаанбаатар хотын Захирагч С.Амарсайхан, “Мөнхийн мөрөөдлөө асаа” TББ-ын тэргүүн Э.Амарсайхан нар өнгөрөгч амралтын өдөр буюу энэ сарын 6-ны өдөр хамтран ажиллах санамж бичигт гарын үсэг зурсан юм.
Санамж бичгийн хүрээнд:
- Өсвөр насны хүүхдүүдэд багийн спортыг сурталчилах, нийтийн биеийн тамирыг хөхүүлэн дэмжихэд хамтран ажиллах
- Хөлбөмбөгийн спортод хэрэглэгдэх талбайн бүтээн байгуулалт төр хувийн хэвшил хамтран ажиллах
- Өсвөр намны хүүхдүүдийн дундах “Мөрөөдлөө асаа” хөлбөмбөмгийн тэмцээнийг хамтран зохион байгуулах юм.
“Мөрөөдлөө асаа” тэмцээнийг нийслэлийн ерөнхий боловсролын бүх сургуулиудын дунд уламжлал болгон зохион байгуулж, тэмцээнийг өргөжүүлэх зэрэг ажлуудыг хийх юм байна.
Санамж бичгийг нийслэлийн Сонгинохайрхан дүүргийн 104 дүгээр сургуулийн байранд үзэглэсэн юм. Учир нь 104 дүгээр сургууль дээврийн талбайдаа хүүхэд багачуудын чийрэгжүүлэх төхөөрөмж, хөлбөмбөг, сагсан бөмбөгийн талбайтай анхны сургууль юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
