Оюутолгой ордыг ашиглах хөрөнгө оруулалтын гэрээний хэрэгжилтийг шалгаж, санал дүгнэлт гаргах үүрэг бүхий ажлын хэсэг өнгөрсөн оны гуравдугаар сард УИХ-ын даргын 2018 оны 57-р захирамжаар байгуулагдаж, тайлангаа ҮАБЗ-д өнгөрөгч гуравдугаар сард хүргүүлсэн байгаа юм.
Нийт 300 гаруй хуудас материал бүхий урьдчилсан дүгнэлтийг нууцын зэрэглэлтэй тараасан бөгөөд ажлын хэсгийнхэн “Дубайн гэрээ”-г зайлшгүй шинэчлэх, засаж сайжруулах, эсвэл цуцлах нөхцөл байдал үүсэхүйц олон зөрчил байгаа хэмээн дүгнэжээ. Оюутолгой компани далд уурхайн бүтээн байгуулалт, санхүүжилтийн төлөвлөгөө буюу Дубайн гэрээнд олон улсын МЕГА даатгалыг маш өндөр үнээр хийлгэсэн аж. Уг мега даатгалын компани нь олон улсын санхүүгийн корпорациудтай холбоотой зэрэг олон асуудал байгаа гэдгийг ажлын хэсгийн ахлагч Д.Тэрбишдагва хэлж байна. Тиймээс ҮАБЗ энэ тал дээр зөвлөмж гаргах зайлшгүй шаардлагатай гэж үзжээ.
Эцсийн шийдвэрийг ҮАБЗ болон УИХ гаргана. Дубайн гэрээний шалгалтын дүнг УИХ намрын чуулганаараа хэлэлцэх байсан ч ирц хүрээгүй зэрэг шалтгаануудаар өнөөдрийг хүртэл хойшлогдоод байна.
