Орон сууцны мкв-ын дундаж үнэ 2,260,363 төгрөг байна
Тоо баримтуудыг үзвэл Улаанбаатар хотын хэмжээнд 2019 оны нэгдүгээр сарын байдлаар 57,883 айлын орон сууцны 328 төсөл хэрэгжиж байна. Нийт төслүүдийн: 214 төсөл нь захиалга авч байгаа, 73 төсөл нь захиалга авч эхлээгүй, 42 төсөл нь захиалгаа түр зогсоосон байдалтай байгаа юм. Захиалга авч буй нийт орон сууцны 37.1 хувь буюу 12,500 айлын орон сууц нь Баянзүрх дүүрэгт захиалга авч байгаа бол, дараагаар нь Хан-Уул дүүрэгт 11,462 айлын орон суууцны төсөл захиалга авч байгааг Тэнхлэг зууч ХХК –ийн 2019 оны нэдүгээр сард гаргасан шинэ болон хуучин орон сууцны зах зээл, үнэ ханшийн мэдээнд танилцуулаад буй.
График 1, Захиалга авч буй нийт орон сууцны төслийг байршлаар нь харвал,
Тэгвэл захиалга авч буй орон сууцыг зэрэглэлээр нь харвал: 36.0 хувь нь стандарт, 43.1 хувь буюу 14,519 айлын орон сууц нь дундаж, 18.2 хувь нь бизнес, 2.7 хувь буюу 908 айлын орон сууц өндөр зэрэглэлд хамрагдаж байгааг график 2-оос харж болно.
Өөрөөр хэлбэл өндөр зэрэглэлийн /тансаг зэрэглэлийн/ орон сууцны захиалга хамгийн бага хувийг эзэлж байгаа юм. “Тэнхлэг зууч”-ийн мэдээлж буйгаар 2019 оны нэгдүгээр сард шинэ орон сууцны 1 мкв-ын дундаж үнэ 2,260,363 төгрөг байна. Энэ нь өмнөх сараас 0.13 хувиар буурсан бол урьд оны мөн үеэс 1.34 хувиар өссөн үзүүлэлттэй байна.
Түрээсийн орон сууц шинэ бизнесийн модель болон гарч ирж байна Орон сууцны зах зээлын талаар “Mongolian Property Management Group”-ийн гүйцэтгэх захирал Г.Ариунжаргалаас тодрууллаа.
– Энэ оны эхний гурван сарын байдлаар орон сууцны зах зээлд ямар өөрчлөлт орсон бэ?
-Зах зээлд байгаа бэлэн мөнгөний эргэлт бага байна. Энэ нь өнгөрсөн оны мөн үетэй харьцуулхад дунджаас дээгүүр орон суудны борлуулалт 15-20 хувиар буурах шалтгаан болж байна. Гэхдээ энэ нь тансаг зэрэглэлийн орон сууцны үнэ хямдрах шалтгаан болохгүй байгаа нь түүний өртөгтэй холбоотой хэмээн үзэж байна.
– Манай улсын орон сууцны үнэ, борлуулалт цаашид ямар байх төлөв ажиглагдаж байна вэ?
– Эдийн засаг 2019 ондоо уналттай байгаа бол 2020 оноос өсөлт үзүүлнэ гэсэн өөдрөг хүлээлттэй байна. Тиймд бидний зүгээс энэ оны хувьд дунджаас дээгүүр үнэтэй орон сууц худалдан авах худалдан авагчдаа мэдээллээр хангаж бэлтгэх ажлыг түлхүү хийж байна. Олон улсын практик ба заал зээлийн сегмэнт бүр дээр шинэ худалдан авагч төрж байдаг. Тиймд тэднийг тандаж, цаг үеийг нь мэдэрч оновчтой худалдан авалтыг зөв цагт санал болгох нь зөвлөх компаний үндсэн үйл ажиллагааны нэг. Орон сууцны үнийг нийтээр нь авч үзвэл 1 мкв нь 1,300,000-8,500,000 хүртэл байна.
– Иргэдийн дунд орон сууцыг тэр дундаа тансаг зэрэглэлийн орон сууцыг түрээслэх нь их болжээ. Энэ байдлыг тайлбарлахгүй юу?
– Түрээсийн хувьд их өөр ойлголт. Тансаг зэрэглэлийн орон сууц зарагдахаа болих үед түрээсийн зах зээл ихэсдэг. Тансаг зэрэглэлийн орон сууц зарагдах нь багасах үед эсэргээрээ түүний түрээс нэмэгддэг. Мөн манай улсын хувьд тансаг зэрэглэлийн орон сууцны түрээсийн хэрэгцээ тогтмол өндөр байдаг гэж хэлж болно. Өнөөгийн нөхцөл байдалд 500 сая төгрөгөөр байр худалдаж авахуу, түүний 10 хувиар хүссэн байраа түрээслээд 1-1,5 жил амьдраад үлдэгдэл 450 сая төгрөгөө банкинд хадгалах уу гэдэг хөрөнгө оруулалтын хамгийн энгийн шийдвэр юм.
– Иргэд анхны хэрэгцээгээ хангаад хоёр дахь байраа худалдан авч хөрөнгө оруулалт хийх хэлбэр их болоод байх шиг?
– Сүүлийн үед дундаж орлоготой иргэдийн дунд хоёр дахь орон сууцаа моргажийн эсвэл байгууллагын хөнгөлөлттэй зээлээр худалдан авч, түрээслүүлэх замаар эдийн засгийн эргэлтэд оруулж байна. Өөрөөр хэлбэл, 20 жилийн хугацаатай авсан зээлийн байр нь түрээсийн орлогоороо 100% санхүүжих боломжтой. Олон улсын ч тэр, дотоодын хөрөнгө оруулагчдын хөрөнгө оруулалтын зан төлөв, шийдвэрийг ажиглахад үл хөдлөх хөрөнгөөр хөрөнгө оруулалтын багцынхаа 50-60 хувийг бүрдүүсэн байдаг нь үл хөдлөх хөрөнгө хөрөнгө оруулалтын хамгийн том хэрэгсэл гэдгийг нотолж буй хэрэг.
– Яагаад түрээслээд амьдрах нь илүү дээр гэж. Өөрийн гэсэн орон сууцтай болчихвол амар биш гэж үү?
– Би 800,000 төгрөгийн цалинтай. Гэтэл найман хувийн зээлээ төлөхөд зориулж 400,000 төгрөгийг нь банкны хүүд өгөх үү. Эсвэл ямар ч зовлонгүйгээр би 400,000-500,000 төгрөг төлөөд байр түрээслээд амьдрах уу гэх сонголт тулгарна. Яагаад заавал банкинд 400 мянган төгрөг сар болгон олж өгнө гэж. 20 жил би ингэж явна гэвэл харамсалтай. Үүнийг сүүлийн үед залуучууд сайн ойлгоод, Монголын дундаж цалин сайжиртал түрээслэх шийдвэр гаргадаг болсон. Энэ бол санхүүгийн хувьд маш чухал шийдвэр.
Өнөөдөр манай улсын дундаж цалин бага, банкны хүү өндөр байгаагаас болж эрсдэл хүлээж амьдрахгүй байхыг эрмэлздэг хүмүүс бий болж байна. Гадны улсуудад орон сууц эзэмших гэх ойлголт байдаггүй. Ихэнх нь түрээсэлж амьдардаг хэв маягт шилжсэн. Өөрөөр хэлбэл түрээсийн орон сууц шинэ бизнесийн модель болон гарч ирж байна. Улаанбаатар хотын 2000 оноос өмнөх хуучин орон сууцны дундаж үнийн мэдээллээр Чингэлтэй, Сүхбаатар дүүрэгт хамгийн өндөр үнэтэй байгаа аж.
Эдгээрээс хамгийн хямд үнэтэй нь Сонгинохайрхан дүүрэгт худалдаалагдаж байна. Энэ оны нэгдүгээр сард нэг өрөө байрны үнэ Чингэлтэй дүүрэгт хамгийн өндөр буюу 61.5 сая төгрөг байгаа бол, Сонгинохайрханд хамгийн хямд буюу 40.8 сая төгрөгийн дундаж үнэтэй байна. Харин хоёр өрөө байрны хувьд Чингэлтэй дүүрэгт 91.2 сая төгрөг байгаа бол дараагаар нь Сонино хайрхан дүүрэгт 53.1 сая төгрөгийн үнэтэй байна. Орон сууцны борлуулалт тэр дундаа тансаг зэрэглэлийн орон сууцны борлуулалт муу байгаа ч түрээсийн зах зээл харьцангуй сайн байгааг салбарынхан хэлж байна.
Эх сурвалж: Ikon.mn
