Согтуугаар машин жолоодсон 20 настай иргэнийг Хөвсгөл нуураас эсэн мэнд гаргаж авчээ

Согтуугаар тээврийн хэрэгсэл жолоодож улмаар Хөвсгөл нуурын мөсөнд цөмөрч осолдсон хэрэг өчигдөр гарчээ. Тодруулбал, Хөвсгөл аймгийн Алаг-Эрдэнэ сумын Хатгал тосгон багийн “Далайн хоолой” гэдэг газар /аймгийн төвөөс хойд зүгт 110 км, Хатгал тосгоноос урд зүгт 4 км-т/ тус тосгоны харьяат иргэн 20 настай эрэгтэй O нь согтууруулах ундаа хэрэглэсэн үедээ жолоодож явсан “Старикс” загварын суудлын автомашин Хөвсгөл нууранд цөмөрчээ.

Уг ослын дуудлагыг /03.17/ өчигдөр 22:55 цагт хүлээн авч тус аймгийн Онцгой байдлын газрын Гал түймэр унтраах, аврах 69 дүгээр ангийн 5 алба хаагч, 1 автомашинтай 22:59 цагт очин, 23:05 цагт иргэн О…-г нуураас эсэн мэнд гаргаж, цагдаагийн байгууллагад хүлээлгэн өгчээ. Харин автомашиныг өнөөдөр нуураас татаж гаргах аж.

Эх сурвалж: ОБЕГ