Нийслэл

“Ойлгох 1 хором“ хөдөлгөөн өнөөдрөөс улс орон даяар эхэлж байна

Цагдаагийн Ерөнхий газраас иргэд, олон нийтийг аливаа гэмт хэрэг, зөрчлөөс урьдчилан сэргийлж, хууль эрх зүйн мэдлэг, ойлголт өгөх үүднээс олон төрлийн аян, хөдөлгөөнийг зохион байгуулдаг болсон.

“Шийтгэх, баривчлах, албадлага хэрэглэх нь цагдаагийн тэмүүлэл биш. Шудрага ёсыг эрхэмлэж, хүмүүнлэг, ардчилсан нийгмийн үнэт зүйл, хууль сахин биелүүлэхийг таниулах замаар иргэдийг гэмт хэрэг, зөрчлөөс урьдчилан сэргийлэх нь цагдаагийн чин эрмэлзэл мөн” хэмээн тунхагласан.

Энэ хүрээнд хүний эрүүл мэндийн халдашгүй байдлын эсрэг гэмт хэргээс урьдчилан сэргийлэх зорилгоор “ОЙЛГОЛЦОХ 1 ХОРОМ” хөдөлгөөнийг өнөөдрөөс орон даяар зохион байгуулж байна.

ЦЕГ-аас хийсэн судалгаагаар сүүлийн таван жилийн хугацаанд нийт гэмт хэргийн 25-30 хувийг Хүний эрүүл мэндийг халдашгүй байдлын эсрэг гэмт хэрэг эзэлсэн байна. Тэр дундаа гуравдугаар сард энэ төрлийн гэмт хэргийн гаралт хамгийн өндөр байдаг байна. Энэ нь гуравдугаар сард олон баяр, тэмдэглэлт өдөр болдогтой холбоотой аж.

hkfic “Ойлгох 1 хором“ хөдөлгөөн өнөөдрөөс улс орон даяар эхэлж байна

Жил ирэх тусам энэ төрлийн гэмт хэрэг өсөж байна. Нийслэлд 61%, орон нутагт 31% үйлдэгдэж байна. Гэмт хэргийн гаралт нөхцөл байдлыг нарийвчлан авч үзвэл 40 хувь нь гэр орон ахуйн хүрээнд, 27-30 хувь нь гудамж талбай, олон нийтийн үйлчилгээний газар шөнийн цэнгээний газар ихэвчлэн үйлдэгдэж байна. Гэмт хэрэг гарч буй цагаар нь ангилбал оройн 22:00 цагаас өглөөний 06:00 цаг хүртэл хугацаанд хамгийн их буюу 39 хувь нь үйлдэгдсэн байна.

ЗАЛУУЧУУД ХОРОМХОН ЗУУРЫН УУР БУХИМДЛАА БАРЬЖ ЧАДААГҮЙГЭЭС БОЛООД АМЬДРАЛАА СҮЙРҮҮЛДЭГ

Энэ төрлийн гэмт хэргийн 88,6% нь бусдын биед хөнгөн гэмтэл учруулсан байгаа. Шалтгаан нь хоромхон зуурын уур бухимдлаа барьж дийлэхгүй, архидан согтуурсан үедээ үйлдэж байна. Энэ гэмт хэрэг нь богино хугацаанд хүний эрүүл мэнд, амь насанд ноцтой хохирол учруулдаг.

Үл ялих шалтгаанаас болж гэмт хэрэгт холбогдож байгаа учраас мэргэжлийн байгууллагын зүгээс анхааруулж, хор уршгыг нь танин мэдүүлж байвал буурах бүрэн боломжтой. Залуус бусадтай үл ярих шалтгаанаас үүдэн маргалдаж, улмаар зодолдсоноор эрүүгийн хариуцлага хүлээж, сэтгэл санаа, эрүүл мэнд, санхүүгийн хувьд хохирч үлддэг байна.

Энэ төрлийн гэмт хэргийн 50 орчим хувь согтуугаар үйлдэгдэж байгаа учраас цагдаагийн байгууллагын зүгээс шөнийн цэнгээний газруудын ажиллах цаг, архи согтууруулах ундаа худалдаалах газруудын зөвшөөрлийг эргэж хараач ээ хэмээн холбогдох байгууллагуудад хандаж байгаа ажээ.

ЦЕГ-ын Урьдчилан сэргийлэх хэлтсийн дарга, цагдаагийн хурандаа Г.Арсланхуяг: Залуусаа ганц хормын уур бухимдлаа “УУЧЛААРАЙ” гэдэг үгээр сольцгооё

4hmab “Ойлгох 1 хором“ хөдөлгөөн өнөөдрөөс улс орон даяар эхэлж байна

Энэ төрлийн гэмт хэрэгт хүүхэд залуучууд ихээр холбогдож ял шийтгэл ихээр авдаг. Тус гэмт хэргийн 88 хувийг хөнгөн гэмт хэрэг байна. Ямар нэгэн өш хонзон санахгүйгээр зодолдох, бухимдаж, архидан согтуурснаас хүний биед хөнгөн болон хүнд гэмтэл учруулж байгаа.

Өнгөрсөн жил “Хуулийн хэрэгжилт” арга хэмжээг зохион байгуулсан бол энэ жил “Ойлголцох Нэг хором” буюу уураа тэвчье гэсэн арга хэмжээг ТББ-ууд, Боксын холбоо, Сагсан бөмбөгийн холбоо, БСШУСЯ, их дээд сургуулиуд хамтран ЦЕГ-аас зохион байгуулна. Нийгэмд байгаа уур бухимдал, стрессээ барьж сурах, хүнтэй эвтэй, харилцаа хандлагаа өөрчлөх энэ гэмт хэргийн хор уршгийг таниулна.

Хүний эрүүл мэнд, эрхэнд халдсанаар ямар хуулийн хариуцлага хүлээх талаар хууль эрх зүйн мэдээллийг олон нийтийн хэрэгслээр ухуулах ажлыг энэ гуравдугаар сард нилээдгүй хийнэ. “ОЙЛГОЛЦОХ 1 ХОРОМ” аян нь орон даяар зохион байгуулагдана.

Гэмт хэргийн 64 орчим хувь нь нийслэлд үйлдэгддэг. Бид маргааш буюу энэ сарын 5-нд Их дээд сургуулийн  3000 орчим эрэгтэй оюутнуудад харилцаа хандлага, эрүүл мэндийн талаар лекц уншиж сургалт, зөвлөгөөн зохион байгуулна.  Хүний эрүүл мэндийн халдашгүй байдлын эсрэг гэмт хэрэг өш хонзон санасан биш тухайн үед л уураа барьж дийлээгүйгээс болж үйлдэгддэг.

Залуучуудын хувьд баярлах нэрээр шөнийн цэнгээний газар орж, архидан согтуурч зодолдож, танхайрах нь тэр хэмжээгээр эрүүл мэнд, эд хөрөнгөөрөө хохирч үлдэж байгаа нь харамсалтай байна. Тиймээс бид ухуулга, нөлөөллийн ажлуудыг хийхээр энэхүү аянаа эхлүүлээд байна.

Цагдаагийн байгууллагаас “Залуучуудаа ганц хоромын уур бухамдлаа “Уучлаарай” гэдэг үгээр солье” хэмээн  уриалж байна. Ухаалаг залуусын ухаантай үйлдэл бол амьдралыг аварна.

w26ik “Ойлгох 1 хором“ хөдөлгөөн өнөөдрөөс улс орон даяар эхэлж байна

vsnad “Ойлгох 1 хором“ хөдөлгөөн өнөөдрөөс улс орон даяар эхэлж байна

a86o7 “Ойлгох 1 хором“ хөдөлгөөн өнөөдрөөс улс орон даяар эхэлж байна

Эх сурвалж: ЦЕГ-Урьдчилан сэргийлэх хэлтэс

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close